本地財資界老行尊，人稱「范生」嘅富邦銀行（香港）執行董事兼金融市場執行副總裁Horace范上欽，將會喺7月初退休，可以蹺埋腳享清福嘞，原本由佢主管嘅富邦金融市場，早前亦已交棒畀接班人葉華強打骰。
銀行界口痕友話，以范生喺金融界嘅人脈關係同江湖地位，富邦都好希望挽留佢繼續做非執董，為股東謀福祉，不過正好踏入六旬退休年齡嘅范生，可能好想過吓笑傲江湖嘅日子，同佢喺外國嘅仔女多啲共敍天倫，所以最終都決定全身而退，估計佢嘅財資市場委員會執委一職，稍後都會辭埋。
昆仲各有所成
從事財資市場業務30幾年嘅范上欽，喺行內出名好脾氣，人緣佳。佢兄弟係著名肝臟移植專家、港大教授范上達。范上達由96年開始，同佢班肝移植小組開創右葉肝移植技術，今年初攞到05年度「國家科學技術獎」。昆仲二人，各有所成，一個名冠醫學界，一個縱橫銀行界。
李華華
