賭王何鴻燊前晚捐出330萬元，再包下全場80萬元酒水費，共付出410萬元，以賺得在公益金慈善晚宴上表演棟篤笑的機會，他逐一批評有份獻唱的高官及銀行大班後，說到尾段終於入正題，在台上公然為八月出新唱片的愛女超儀賣廣告，叫大家畀面「買番多少」，認真用心良苦。
公益金前晚在尖沙嘴洲際酒店舉行「大班獻藝為公益」慈善晚宴，一眾銀行大班及高官包括滙豐銀行亞太區主席鄭海泉、渣打銀行執行董事蘇利民、財經事務局局長馬時亨及九巴董事陳祖澤等，紛紛為慈善獻唱，賭王何鴻燊則慷慨捐出330萬元善款，並包下全場價值80萬元的酒水費用。賭王四位千金超瓊、超鳳、超蕸及超儀（Josie）更偕同湊大她們的奶媽晶姐出席，原來眾女是為了捧父親場，欣賞賭王表演棟篤笑。
愛女心甜
上台獻花熱情送吻
壓軸演出棟篤笑的賭王一貫妙語如珠，沒想到他竟忽然在台上為愛女超儀大賣廣告，他說：「音樂界真係有好多人卧虎尋龍（編按：應為卧虎藏龍）嘅，好似我個女Josie，嚟緊夏天就出新唱片嘞，天口熱，希望大家都買番多少啦。」其後賭王四位千金超瓊、超鳳、超蕸及超儀輪流上台獻花給父親，獲老父幫忙賣廣告的超儀更送上親吻。
另一方面，賭王前晚亦逐一品評各大班及高官的歌藝，他說：「近期好多朋友公司開幕、生仔結婚都搵我上台講嘢，咁公益金請到就梗冇托手踭啦，要我批評咁多位嘉賓，一啲係管錢嘅銀行大班，揸住條大水喉嘅，有啲又係交通總司令，仲有女士㖭，女士唔得罪得㗎嘛！其實都有啲驚驚哋，呢件係件苦差嚟，嗱！Ladyfirst，我先講阿莊士集團主席莊紹綏太太先，佢人靚歌甜誇啦啦，佢唱嗰首《恰似你的溫柔》，畀其他人實唱到係『殺死你的溫柔』。」
高官獻唱
「唔想聽捐六萬就得」
賭王又說：「阿鄭大班（鄭海泉）同黎明呢對組合，就直情係美女與野獸（BeautyandtheBeast）啦。」此話一出，台下賓客哄堂大笑，賭王即接着說：「鄭大班係獅子銀行大班，咁仲唔係野獸？嗱，阿John（陳祖澤）仲犀利，我以為佢今晚會唱粵曲，點知佢唱《一點燭光》，用1點博21點，博到爆莊，如果佢去澳門一定前途無限。」
此外，前晚除賭王的棟篤笑精采外，司儀陳欣健亦表現出色，他在台上說：「要聽各位大班高官唱歌都係捐五萬蚊啫，朱咪咪價都唔得啦，不過大家如果唔想聽都有辦法，捐六萬蚊就得㗎嘞。」
採訪、攝影：顏英儀
