喺21年前推出嘅不朽經典《孖寶兄弟》，不單止係全球最暢銷遊戲，試問有邊個老餅機迷未玩過？NDS最新一集回歸原點，3D畫面不過玩番2D橫向捲軸，瑪利奧更可變到成個畫面咁大，所有水管、石頭統統可撞爆，大有擋我者死之勢！隻Game今日正式派貨落場，孖寶Fans點走得甩？
文：陳福榮
《新孖寶兄弟》都算係向元祖《孖寶》致敬之作，皆因並唔似得《孖寶64》或者《陽光瑪利奧》咁另闢新天地，而係故意將表達手法照住初代嚟做，再引入3代同4代等嘅優點。換言之佢保留住一直向右走就到終點嘅傳統，仲有喺衝線時可以跳到勁高「扯旗仔」㖭！啱晒既要懷舊又想玩新嘢嘅資深玩家。
8大世界逐關闖
同3代極似嘅地方，係玩家要喺8個世界進行冒險，必須完成頭關至可開啟之後嘅版數，兼且設有俾你拎道具嘅蘑菇屋、會打中波士嘅小城堡同每關重點大城堡，整個流程近乎一樣。令人欣慰嘅係，佢不單止有單人模式俾你發揮，更有2人對戰專用嘅「MariovsLuigi」同合共28個小遊戲嘅「Minigames模式」，就算爆晒機都仲有大把正嘢玩。
動作繁多考技術
以前啲《孖寶》操控算係比較簡單，識得善用個加速掣已經玩晒咁滯，直到超任時期嘅4代就追加多幾種Pattern。如今《新孖寶》亦秉承呢隻特點，可以喺食咗紅菇之後用「屁股撞」嚟爆開啲石拎隱藏寶物，仲加埋「黐牆彈」、「水管衝天飛」同「旋轉大跳」呢啲新招，唔識用就肯定爆唔到機！另外佢好多版面嘅設計，都沿用番過往著名版圖，譬如鬼屋、游水同城堡等，當然都係有咁上下嘅Upgrade，玩上手絕對唔會嫌老土。
新增蘑菇威力強
比起其他新元素，今次新增設嘅巨大菇同縮小菇就肯定係呢隻遊戲嘅最大特色，事關徹底改變咗老牌玩家對《孖寶》嘅既有印象！先講巨大化，咪以為變大咗會好蝕，其實喺呢種近乎無敵嘅狀態下係俾你不斷向前衝，就連水管都撞得爛，喺限定時間入面破壞得愈多嘢，逐漸增加上面條能量計，到夠鐘就用嚟換番相對嘅1UP綠菇。至於縮小當然係俾人「捐窿捐罅」時用，縮到成粒豆咁嘅瑪利奧可以進入藏有特殊寶物嘅地方，除此以外亦因為夠輕而使出「輕功水上飄」神技，單係呢樣嘢已經盞鬼到暈！
PROFILE
遊戲類型：動作
對應機種：NDS
遊玩人數：1至4人
開發廠商：任天堂
售價：$245
售賣點：DreamStore（25753285）
