李彩華（阿Rain）、張家輝、吳鎮宇、黃秋生等噚日為新片《黑白道》（暫名）進行開鏡拜神儀式，阿Rain喺戲中一改玉女形象，扮演猜拳手，仲要食煙，阿Rain話：「我一向好討厭食煙，今次係為拍戲犧牲，搞到我𠵱家有少少心癮㖭。」
阿Rain喺片中同張家輝有感情戲，不過現實中佢就似乎鍾意吳鎮宇多過張家輝，讚吳鎮宇好靚仔，仲話男仔個嘴細細哋真係幾舒服，但係對於阿Rain嘅美言吳鎮宇就似乎唔係好受落，話估唔到阿Rain有另類口味。
張家輝追多個
噚日係母親節，張家輝就因為要拍戲就唔可以陪老婆關詠荷過佢首個母親節，佢踢爆關詠荷竟然密謀將愛女嘅利是錢當作做母親節禮物，張家輝講起四個月大的愛女更滔滔不絕，仲話：「小朋友真係帶來無限興奮，遲啲都相信會追多個，雖然我唔細，但仲有能力。」
另外，黃秋生日前因唔滿意被追訪，辱罵記者食屎，噚日佢喺現場繼續發火炮轟，但得一個記者肯訪問佢，睇嚟人品同人緣，秋生都冇乜。
