今朝港股點開，係人都估會跌。上周五美股再散，滙控（005）又跌，見淡睇淡人之常情。跌200點先至高追P輪，可能已失先機，倒不如睇位，喺低位買C輪博反彈。
恒指跌200點，跌幅1.2%，好多股票跌幅會唔止1.2%。睇定呢啲股票，啱價就買佢哋啲C輪。暫時市況蕩吓蕩吓，落場玩嘢，輕注好啲。
滙控C輪9037：滙控（005）上周收141元，1周升幅3.80元。如果見回落到137.20元，即前周收市價，則出擊買C輪博反彈。對象之一係9037，11月尾夠鐘，輪價72仙，溢價3%，槓桿率19.6倍（有效11.4倍），引伸波幅14.9%。對象之二係4858，輪價85仙，9月底到期，溢價1.8%，槓桿率16.6倍（有效11.2倍），引伸波幅15.9%。
滙控後日除息0.15美元，太短期嘅滙控C輪，暫時避開。
中信C輪3525：中信泰富（267）上周收25.15元，1周跌1.20元。中信4月初因為買澳洲鐵礦而由24元左右彈升至28.70元，今回若隨大市回落到接近起步位，博C輪反彈。
正路之選係3525，8月初到期，輪價35仙，溢價1.1%，槓桿率7.1倍（有效6.5倍），引伸波幅22.4%，呢隻係最熱門嘅中信C輪。其次可以諗吓嘅係4585，溢價多少少，壽命與槓桿率着數啲。
章盛