擅演小人物角色的許紹雄，原來出身顯赫家族，叔公許崇智是協助蔣介石創立黃埔軍校的粵軍總司令，姑婆許廣平則是中國著名作家魯迅的夫人。父親開金舖的許紹雄偏偏有太子爺不做，跑去當藝員，月薪$500。雖然做了35年仍是當綠葉，但自嘲呃飯食的許紹雄長做長有，拍劇薪酬還勝過許多一線小生。 撰文：戴彩煥
也許大家以為許紹雄因為喜歡演戲而放棄家族生意，但事實並非如此，他笑說：「當年我咁大個仔都未去過電視台，嗰時知道畀五蚊就可以報藝員訓練班，咪畀五蚊去見識吓囉，冇諗過真係收我。」許紹雄71年報讀無綫首屆藝員訓練班，畢業後加入《歡樂今宵》，月薪$500；74年獲麗的電視（亞視前身）高薪挖角，月入$1,900。
金蟬脫殼 重返娘家
轉投麗的後，許紹雄自覺被投閒置散，某日遇上無綫高層何嘉聯時，即主動要求重返娘家，他說：「我同何嘉聯講：『好X悶，返嚟啦！』佢話：『你啱啱同麗的續約，你搞得掂份約咪返嚟囉！』第二日我攞住抽獎贏番嚟嗰張機票做道具，同麗的高層高亮講：『我做到冇乜意思，我想離開香港，機票都買埋！』然後攞張機票喺佢面前揚一揚，結果第三日佢就無條件同我解約。」
許紹雄續說：「原本合約話明解約後一年內唔可以過其他電視台，高亮都幫我刪咗去，睇死我去得邊！後來知道我返TVB、自己孭咗鑊，咪登報紙話我成日遲到早退，係個唔稱職嘅演員嚟幫自己補飛囉！」
無賴鼻祖 輸打贏要
多年來，許紹雄雖然拍過不少叫好叫座的經典劇集和電影，但一直只當綠葉，問他可曾覬覦過一線小生之位？他說：「完全冇！人要自量，搵許紹雄做男主角，咪即係掟錢落鹹水海！做一線壽命唔長，由高跌番落嚟仲難受！部劇衰咗係主角孭，好嘅又話有自己份、掹車邊，輸打贏要，幾無賴呀！」問有哪些不滿意之作時，許紹雄笑說：「部部都差唔多，無謂得罪人啦，我都係呃吓飯食啫。」
從電視到電影，許紹雄一直長做長有，據知他拍劇的薪酬比許多一線小生還高，他笑說：「應該係啩，我哋呢啲少競爭對手，冇人爭到我哋個位，做到死嗰日都有得做！自己肯蝕底，自然多人搵你，吓吓企硬要收咁多，人哋又唔係冇咗你唔得。」
臨崖勒馬 拒絕當差
其實當年許紹雄亦曾有機會轉行，他說：「72年我拍無綫同警察部合作嘅《歧途》，警察部公關阿頭Mr.English話我似CID，問我有冇興趣轉行，有成3,000幾蚊個月，仲話唔使做軍裝，幾多人恨都恨唔到！我唔記得點解冇應承，不過有咗ICAC之後，Mr.English就吞槍自殺。當年如果我轉行，自然會收埋一份，𠵱家一係享緊福，一係坐緊監！」
