股市暢旺，𠵱家經已到咗牛頭角順嫂隨口都講得出幾個熱炒冧巴嘅地步，財經事務及庫務局局長馬時亨噚日就出口術，阻人發達。馬局長話見到唔少老人家跟風炒輪，以為銀碼有限就放膽出擊，但係就唔清楚呢啲衍生工具風險其實好高，有人甚至瞓身將成份老本押落去，初時可能有錢賺，但正所謂輸錢皆因贏錢起，結果多數人蝕錢離場，佢話見到有人成份老本化為烏有，真係好心痛。
老人家識少少就炒輪，直情搵命搏，馬仔話佢年紀大，唔受得刺激，因此近年已調整投資組合，買多咗債券收息，雖然回報可能冇咁高，但勝在穩陣唔使擔驚受怕。佢又話隨着人口老化，香港金融界應致力發展債券市場，推出更多產品畀老人家，等佢哋有較低風險嘅投資選擇。
爆料熱線：29290000、27860099
報料傳真：26239278
報料電郵：[email protected]