前排有消息話，中聯辦副主任彭清華（圖左二）會代替夠鐘嘅廖暉做港澳辦主任，另一個副主任李剛啱啱返中央讀完黨校，遲吓會升埋做主任、踢走高祀仁。彭清華噚日同記者講，呢啲都係道聽塗說，大家下年都會喺香港見到佢，呢啲消息唔準確。
雖然話係謠傳，但佢老兄全程笑晒口咁講，個樣好似已經有得升官咁，睇怕消息都未必錯得晒。彭清華仲笑笑口寸啲記者話，你估入黨校好巴閉咩？佢夠入過黨校讀啦！黨校一年收咁多學員，如果個個都要提拔咪好唔得掂！
噚日有個青年會計師發展交流會成立，呢個協會得到中央認可，係人大副委員長許嘉璐建議搞嘅，所以中聯辦好多官到，就連中央財政部副部長王軍都去捧場，睇怕民主派要喺會計界爭選委，都要再努力啲先爭到。
爆料熱線：29290000、27860099
報料傳真：26239278
報料電郵：[email protected]