「媽咪，我愛你，多謝你咁多年嚟畀我嘅愛同關懷。今個母親節如果唔使開工，希望可以陪佢行街食飯，媽咪好慳住我銀包，唔會要求我買禮物，但佢想要乜我會盡量買畀佢，其實最緊要成家人開心，唔一定係物質。我細個時成日都食藤條燜豬肉㗎，因為我細個貪靚，媽咪出咗街我成日攞佢啲高踭鞋同唇膏嚟扮嘢，幾乎每次都俾阿媽發覺，之後就要受罰囉。」
鄧麗欣鑽飾保值
「點都會同阿媽食餐飯先，我已經向公司申請母親節夜晚唔做嘢。其實諗禮物都幾頭痛，都唔知送乜好，差唔多樣樣都送過晒，我媽咪仲要係送嘢畀佢但唔捨得用嘅人，不過我諗都係送鑽飾啦，可以保值嘛！女人通常都鍾意鑽石㗎啦，同埋佢好鍾意睇我啲戲嘅首映時，戴晒我送畀佢啲鑽飾，騷完之後佢就會收番埋，有機會先再戴。」
周慧敏送花補償
「以前每個母親節，我都會同媽咪食飯慶祝，不過今年我要綵排演唱會，所以未知時間點安排，但我一定會盡量抽時間喺正日陪佢一齊過，同埋我諗住送一束好靚嘅花畀佢，因為媽咪好鍾意花，雖然我唔熟悉花，但係我知佢任何花都鍾意，所以我估會買啲應節嘅花，好似康乃馨咁囉！」
佘詩曼憑卡寄意
「媽咪……好想你多啲返香港，煮多啲好餸畀我食，我日日都咁錫你。媽咪喺美國，我已經寄咗張母親節卡畀佢，禮物就等媽咪遲啲返香港先再補送番，以前細個每逢節日我都會親手畫張卡送畀媽咪，有年買咗張卡畀佢，點知佢唔開心，覺得我唔重視佢。我讀幼稚園高班嗰時試過喺雪櫃偷朱古力食，俾媽咪發現咗，打咗我手板一下，嗰次係初次媽咪打我，亦係唯一一次，當時重嬲咗三個鐘。」
採訪、攝影：駱華齡、林德雄、卓寶花、胡比、陳俊強
