香港五一黃金周唔見晒啲內地豪客，特別係迪士尼樂園，更加係冷清清。經濟發展及勞工局局長葉澍堃（圖）梗係唔認有問題，話十日內有41萬人次訪港，已經好唔錯。
唉，香港𠵱家真係冇乜嘢強項可以賴以維生，如果連服務業都死埋，就只係獨沽一味搞金融，葉局長同新任旅遊事務專員區璟智真係要諗吓計點搞喇。
煲呔今次連任，成功機會甚高，所以𠵱家已經密鑼緊鼓喺度埋班，葉澍堃屬老餅一族，AO出身，識走位兼錫身，口頭禪係「我唔想升級」，「做人要低調」，因此曾有外號叫「大蛇葉」。
但係自從煲呔當政，搞強政勵治，大蛇都要出動，聽講葉局長最近表現已經過咗煲呔關，預佢一份，即係可以多做五年。
八方查吓本舊公務員手冊，佢老哥51年9月出生，明年只係56歲，好後生啫，仲可以做吓，當然問題係佢老哥肯唔肯同煲呔共同進退喇！
爆料熱線：29290000、27860099
報料傳真：26239278
報料電郵：[email protected]