黃秋生做戲雖然叻，但講到人品同禮貌就真係不敢恭維！早幾日佢同個男性朋友去跑馬地happy，本報有個記者見到影帝出巡，好自然跟住佢睇吓搞乜東東！秋生發現有人跟住佢影相，即刻好惡死咁同朋友一人一邊捉住個記者問：「做乜跟我！」
雖然個記者即刻同佢表明身份，但秋生要求記者出示記者證證明身份，呢方面關仁都覺得好正常。點知個記者張證件留咗喺採訪車，佢同秋生講上車攞畀佢睇，但秋生唔肯放人之餘，仲好寸咁話：「咁即係唔知你係乜人啦！」跟住即刻叫佢朋友報警，然後話：「後生細仔，做乜咁無聊，做埋啲咁陰質嘅嘢！」個記者話佢只係打份工，有乜事大可以慢慢講，點知秋生仲寸爆，好侮辱咁話：「人哋叫你食屎你就食呀，𠵱家我畀錢你，你同我食屎吖！」
警察勸喻了事
之後男記者個拍檔幫佢攞咗張證show畀秋生睇，佢哋仍然捉實人唔放！冇幾耐兩個警察嚟到，了解事情之後，警方都只係提醒記者做嘢時要帶番證件，咁你黃秋生又有乜資格郁手郁腳？
其實，好多明星藝人怕狗仔隊跟蹤，除咗唔想冇晒私人空間外，無非係怕自己做做埋埋嗰啲唔見得光嘅事俾人踢爆！黃先生，你話係唔係？
