「其實前幾年都送過戒指同耳環畀媽咪，不過佢就冇攞出嚟戴，跟住唔知放咗去邊，然後又唔見咗，所以我今年打算畀五位數字現金佢。
「母親節嗰日我會同媽咪佢哋一齊去食飯，平日有時間就會陪佢哋，所以對我嚟講日日都係母親節。」
周國賢自製冧T
「媽咪返咗新西蘭探我細佬，我之前已經同佢提早食飯慶祝。其實我想送件親手設計嘅衫畀媽咪，喺件衫上就寫上『我愛MaMa』嘅字眼，等每年母親節全家就着住呢件衫去飲茶。至於囡囡就仲細，所以我幫佢諗咗母親節禮物，就係叫佢唱歌畀我老婆聽，仲會將啲歌聲錄成CD，一定會冧死老婆呢！」
陳豪寄語祝福
「媽咪身在澳洲，我母親節會打電話畀佢，每年都會封大利是做禮物，佢最需要都係我哋留喺佢身邊，媽咪成日都會返香港，所以我哋相處時間都好多。我屋企有三兄弟，細個鬧完交或者做錯事都會一齊俾媽咪罰，齊齊俾阿媽打屁股，回想番都好有趣。母親節我最想同媽咪講身體健康，我哋三兄弟大個喇，可以放心去享受人生。」
吳浩康錶明心迹
「我諗住送隻錶畀媽咪，等佢可以一睇錶就記得我，因為我遲啲可能會比較多時間喺外地做嘢，唔可以成日留喺香港，隻錶咪當係望梅止渴囉，等佢唔使成日心掛掛嘛。本來都諗住同家姐夾錢送，不過次次最後都係我自己出番錢，都冇乜所謂啦，我試過連生日禮物都係自己買嚟送畀自己。」
採訪、攝影：楊潔雯、駱華齡、卓寶花、胡比、陳俊強
