余安安03年與李萬祺離婚後，與女兒文琪和文騫互相扶持，單親媽咪活得更精采、更堅強。由於長女文琪將會到外地留學，早前安安與寶貝女齊到中環新開的摩登影樓拍照，攬攬抱抱，歡笑聲不絕。加上幼女發自內心的祝福，已是安安今年最好的母親節禮物。 撰文：林妙萍 協力：梁錦雯
今日是母親節，兩女之母的余安安絕對值得表揚。余安安前夫李萬祺數年前有第三者，故她由全職母親變成今日重投娛樂圈、努力工作、享受人生的單親媽咪，視兩個與她情如姊妹的長女李文琪（Marcia）、幼女李文騫（Sasha）為天賜寶藏和生活推動力。
由於18歲的Marcia即將赴英升學，安安早前與女兒到中環Venture影樓，隆而重之拍攝家庭照，紀念這個非常母親節。
安安當日帶同囡囡多年來送贈的生日卡、母親節卡，以及珍藏的豬公仔等作道具，三母女穿小背心、牛仔褲在影樓互相追逐，時而歡呼、時而擁抱，母女間融洽和諧，充滿家庭溫暖。
啱傾冇代溝
安安說：「我哋冇乜代溝，音樂同時裝係我哋共通話題，講吓有乜嘢新牌子，去邊度買靚衫。大女有時會將佢新發現或者好鍾意嘅前衞音樂放喺車度播，同我分享，我哋好似朋友咁，乜嘢都可以講。就算我做錯事，都會同佢哋道歉。」
與賽車手李萬祺於87年結婚，育有兩女，安安一心相夫教子，不過平靜安逸的生活卻於03年4月受到衝擊。李萬祺有外遇，對破產丈夫一直不離不棄的安安，終於為了女人不能容忍的事離婚，下堂求去，而她承受婚姻破碎之餘，還要負起女兒的生活和教育重任，故毅然重投離開多年的娛樂圈，拍電影、拍廣告，成為單親媽咪，卻活得更堅強自信。
婚變壓力大
安安說：「當時壓力大，但我都OK，處理得到，反而係同細路有拗撬時，冇人緩和。以前兩公婆教女，一黑一白，你鬧就我教。同前夫分手之後，我就要做晒好人同壞人，初期唔識處理，好難搞。」她謂幸好兩女兒較成熟，母女無所不談，互相支持，感情更見真摯。安安說：「佢哋幾有心思，會畫吓卡、做吓手作仔畀我，未做媽咪之前，我冇乜大感覺，生咗佢哋，先醒覺做媽咪係一世嘅責任。」
在女兒眼中，安安是個獎罰分明的母親，細女Sasha說：「細個我（沉）迷電視，唔肯讀書，佢會罰我扭耳仔。考試考得好，佢又會讚我哋。媽咪係單親湊大我哋，好叻！我希望佢每個母親節都有驚喜同開心，多謝媽咪！」在旁的安安心甜微笑，女兒由衷的祝福，相信已是她今年收到最好的母親節禮物。
籲享受人生
安安還寄語所有母親要懂得享受人生，她說：「扮靚啲啦，多啲同朋友出去行吓，傾吓偈，24小時困住自己、對住啲仔女，雙方都會拉得好緊，不如出去做吓運動、買件衫、睇場戲，會更加好！」
部份圖片由VentureStudio(HK)提供
