拍戲出色的杜琪峯，罵起人來原來一樣精警，最近他與汪明荃（阿姐）為西九的諮詢名單開火，除了兩位當事人外，其他不相關者如杜汶澤亦站出來撐阿姐，阿杜曾一度為此而扯火，正當眾人以為事件開始白熱化之際，阿杜日前卻忽然說：「我真係冇心要同阿姐嗌交，以前同佢喺無綫咁多年，乜交都嗌完啦！」 撰文：陳月媚
杜琪峯的敢言作風經常得罪人，最近與阿姐汪明荃為了西九的諮詢名單而開火，加入戰團的人愈來愈多，連對事件不太清楚的杜汶澤也站出來撐阿姐，狂言亂語炮轟阿杜「拍戲叻，唔代表可以統治世界」。
對於這次風波，阿杜沒有後悔站出來批評阿姐，身為藝術發展局媒體電影藝術主席的他，對中國傳統藝術粵劇，予以肯定的說：「當然應該保留同推廣，而且要搵方法做到普及，畀更多年輕人去欣賞，好似搵啲當紅藝人去做粵劇，未嘗唔係一個考慮方案。其實我哋同政府都有傾過將來粵劇嘅表演場地問題，知道政府係有心幫忙，可能阿姐唔係咁了解，走出嚟係咁鬧，某啲言論好惡聽，先會撩起我把火。」
「亂批評者收皮」
爭論歸爭論，阿杜強調亦尊重阿姐，因為她對粵劇界有貢獻，不過彼此之間似乎對西九看法有所不同。阿杜日前坐在自己的辦公室裏心平氣和地說：「我真係冇心要同阿姐嗌交，以前同佢喺無綫咁多年，乜交都嗌完啦！我只係針對件事嚟講，我嘅出發點都係支持粵劇界，遲啲我會寫番封信畀陳劍聲同阮兆輝，佢哋都係好有心想幫粵劇界做嘢嘅人，所以我想解釋番畀佢聽我嘅立場。呢次事件誰是誰非，我好相信日後自有公論，不過整件事上，我最討厭一啲唔清楚件事，又唔相關嘅盲頭烏蠅出嚟執死雞博見報，亂咁批評，呢啲人叫佢收皮啦！」矛頭直指太不清楚、與事件亦不相干的杜汶澤。
離巢損失重大
不談粵劇談電影，杜琪峯更加起勁，談及當年與最佳拍檔韋家輝，兩人合作創立銀河映像公司，攜手拍攝無數出色電影，至今仍令人回味。韋如今轉投中國星，阿杜則繼續留守，而老闆則變了是羅守耀。
銀河今年剛踏入10周年，最近便為過去的電影作品，與華納合作推出電影原聲大碟，又推出以介紹銀河十大電影為骨幹的書本作紀念。阿杜回顧公司這10年的變化時，滿有感觸的說：「韋家輝嘅離開係公司重大損失，以前有佢幫手搞創作，我真係輕鬆好多，同佢合作，我覺得好稱心如意，實在好難搵到比佢更好嘅拍檔。但家輝去到邊都好，佢都係我嘅好朋友，不久嘅將來，我又會同佢攜手幫中國星拍攝由劉青雲、安志杰同林熙蕾演出嘅新戲，相信銀河影迷會好期待。」
攝影：仇志德
