「世上只有媽媽好」這句歌詞相信大家都耳熟能詳，當紅藝人擁有今日的成績，他們均異口同聲感謝媽咪的養育和鼓勵。今天是母親節，雖然大部份藝人均工作纏身，未必可以全日做孝順仔孝順女陪伴至愛的媽咪，但他們都非常有心，分別準備了充滿心思又實用的禮物，又或者收工後會合媽咪吃飯慶祝。他們都明白並非母親節當天才要孝順，有心的話天天都是母親節，平日向母親溫馨問候一番，又或說一句我愛你，相信已令她甜在心頭。 撰文：比華利、陳月媚、馮美茵
側田電話傳情
「今年媽咪（右）喺加拿大，所以會打電話同佢講母親節快樂，其實媽咪唔係好重視母親節，印象中最難忘嘅一次母親節係喺加拿大，我哋三兄妹煮過一餐飯畀媽咪食，但不嬲我哋都好少送禮物畀媽咪，至於最想同媽咪講嘅一句說話，就係要多謝媽咪，因為佢對我每做一樣嘢都好支持同鼓勵。」
李彩華添丁賀節
「我特登帶媽咪同我隻松鼠狗腿腿去寵物店揀狗仔，希望加多個家庭成員陪媽咪，其實媽咪睇中咗隻兩個月大嘅松鼠狗BB，但腿腿好似好抗拒咁。不過睇唔啱都冇所謂，因為腿腿搞大咗屋企另一隻松鼠狗蜜蜜個肚，我下個月就做嫲嫲，媽咪就榮升太婆，呢份母親節禮物真係有錢都難買。前排去泰國，我已經買咗個Guess手袋送畀媽咪做母親節禮物，雖然唔係好貴，但就心意搭夠，我母親節做完嘢後仲會買餸煮飯畀媽咪食。」
周潤發食飯補數
「母親節我喺內地拍緊戲，唔可以同媽咪食飯，不過我成日都會打電話畀佢，了解佢嘅近況，不過今年同佢慶祝唔到，真係要同媽咪講聲對唔住，等我拍完部戲返香港，會再補番同佢食飯。呢個世界有兩個女人對我最重要，一個係我老婆，一個係媽咪，媽咪當年寡母婆湊大我哋幾兄弟姊妹，真係唔容易，媽咪係一個好堅強而獨立嘅女人，從來唔會向人低頭，佢都係咁教我，做人一定要爭氣。」
Soler聲聲說愛
Soler大孖Julio：「母親節我哋喺台灣宣傳，所以陪唔到媽咪，不過屋企唔興呢套，其實我得閒就會打電話畀媽咪，我成日都講好愛佢。媽咪有糖尿病，所以成日會問佢有冇忍唔到口，偷食澱粉質嘅嘢，雖然佢唔係好嚴重，平時亦都好乖定時食藥，但都要注意飲食，如果媽咪有偷食，我一問，佢就唔答我，不過有時都會放縱吓，帶媽咪食甜品。」
Dino：「我𠵱家仲諗緊買乜嘢母親節禮物畀佢，我想買條頸鏈。」
古天樂人狗聚餐
「媽媽一早約埋班有養狗嘅媽咪團食飯，我話不如一齊食啦！媽咪隻心肝寶貝阿Lo梗係有份去，不過𠵱家我都幾頭痛，要搵個人食飯嘅地點，要人同狗都入得嘅。我好感激媽咪咁多年嚟對我哋一家人咁照顧，記得有年爸爸同媽媽去旅行，點知出發前爸爸中咗風，搞到佢兩老去唔成，媽咪仲要好辛苦去照顧爸爸，我知道呢次媽咪去唔成旅行好失望，所以我一得閒就會帶父母出去玩，遲啲康城如果時間許可，得嘅話都會帶埋佢一齊去。」
楊千嬅現金孝敬
「對我嚟講，每日都係母親節，要孝順父母就應該日日做，不過母親節都會同媽咪食飯，同埋畀現金孝敬佢。今年我最想同媽咪講，要佢注重身體，因為佢只識得任勞任怨去照顧爹哋、細佬、妹妹同我，永遠都唔會顧自己身子，咁先令我擔心。媽咪喺我好細個嗰時，已經教我做人要光明磊落，千祈唔好鬼祟，我有聽媽咪嘅教誨，媽咪同爹哋對我哋三姊妹管教好嚴，所以我哋都唔敢行差踏錯。」
鄧萃雯關心至上
「我同媽媽一向好有默契，所以唔需要正日做啲乜嘢。要孝順父母，日日都可以孝順。送禮物都係，平時佢有乜嘢需要，我都會送，但我覺得關心緊要過禮物，我同媽咪都幾似，大家好少表達錫大家，對住愈親嘅人，講嘢就愈倔愈直，唔似同其他朋友咁扮客氣，好似有時做緊嘢，媽咪打電話嚟，我會話：『唔得閒，係咁先啦！』希望媽咪體諒我，我唔係冷淡，其實我最錫係佢。」
陳慧琳一家團圓
「雖然母親節當日好忙，但我希望可以盡量抽時間同媽咪食飯，對我嚟講，母親節係畀一啲平時性格內斂、怕醜，唔係咁識表達對母親之愛嘅仔女，到呢日可以名正言順去表達對母親嘅愛。我嘅媽咪係個好有毅力嘅人，呢方面對我影響幾大。媽咪以前成日話我講嘢唔夠斯文，喺佢眼中連講『廁所』都係粗魯嘅，佢仲送本《唐詩三百首》畀我學講嘢，有時我都服咗佢。」
鄭嘉穎愛意溶掉
「最難忘係11、12歲時嘅母親節，我想買花畀媽咪，喺屋企附近買完康乃馨，又想買多份禮物畀媽咪，嗰時嘅天氣好似近排咁，熱熱哋，我見到有架雪糕車喺附近，就諗住買多杯軟雪糕返去畀媽咪食，點知杯雪糕溶晒，返到屋企對住媽咪喊，雖然份母親節禮物溶咗，但媽咪都開心嘅。我知媽咪擔心咗我好多年，希望喺今個母親節後，唔使再為我擔心，可以開開心心。」
梁詠琪下廚獻藝
「母親節我會親自下廚煮番幾味孝敬媽咪，平時都係佢煮畀我哋食，我好少入廚房，所以我下廚，媽咪一定會覺得好難得。我同媽咪一向好好感情，佢不單盡咗母親嘅責任，仲係我最信任嘅朋友，因為遇到開心同唔開心嘅嘢，佢永遠都係我第一個聆聽者，我同佢係一啲代溝都冇，媽咪成日教我做人要潔身自愛，特別喺咁複雜嘅娛樂圈，言行要更加小心，呢啲警誡說話係終身受用。」
