全球最大嘅金融集團花旗，近年好注重推動中學生創意教育及理財哲學，好似由佢哋集團贊助、同非牟利機構寰宇希望合辦嘅「花旗集團成功在望獎勵計劃」，噚日就喺中環遮打花園舉行頒獎禮同創意藝坊，雖然天文台發出雷暴警告，但好彩天公配合，活動進行期間，天色放晴，相信最開心嘅，梗喺主人家花旗香港行長陳子政也。
講番個獎勵計劃，目的係鼓勵教育及社工界，喺中學推行創新嘅教學方式，等啲年輕人唔會成日覺得學習死咕咕，過去四年獲撥款受惠嘅學生，超過一萬人。是次勇奪冠軍嘅四邑商工總會陳南昌紀念中學，以學校籌辦一間銀行，作為教學課程，由商號、員工制服，到管理培訓技巧，都全部係同學仔構思設計，學生又分別扮演櫃台員或顧客，若果開美元戶口，員工要以英語對答；開人民幣戶口，就用普通話，真係做到兩文三語目標。
爆料熱線：29290000、27860099
報料傳真：26239278
報料電郵：[email protected]