報紙冇糧出，拖欠稿費，當然係報館虧損連年，老闆資金調動唔順暢嘅表徵。如果你係報館總經理，總編輯或社長，老闆個個月畀五百萬你出糧，呢份工就易打啦。如果準時收到老闆來款，報紙仍然冇糧出，咁就係你管理不善，亂咁使錢嘞。老闆可以話，我出咗若干億元，蝕晒之後就冇。好呀，咁咪執笠關門囉，繼續做落去，拖欠薪水稿費，究竟所為何事？
報紙社長抱病在身，為報紙鞠躬盡瘁，自己已經好耐冇糧出咯，猶自不時自掏腰包，帶埋錢去打工。咁都算啦，點知報館欠薪成為其他報紙新聞，強積金管理局要檢控僱主拖欠強積金之後，老闆竟然向傳媒指責前管理層（已辭職）管理不善，導致冇糧出。社長人在醫院，苦在心頭，佢啲老友就為之撞火，老叔父對左丁山講：「呢啲係最不負責任嘅說話。」專欄L話：「我之寫稿寫咁耐，幾乎係做緊義工，完全係社長P嘅人面，佢叫我捱落去，我咪捱囉，𠵱家佢走咗，重要畀老闆指責管理不善，實在可怒也，我好難繼續捱義氣咯！」
社長P十零年前做衞星電視台，試過好耐冇糧出，仍然日日返工，死撐；估唔到十年後再次冇糧出，重要蝕埋老本㖭，做一個有情有義嘅傳媒人，真係好苦。比較老派嘅傳媒人，屬於君子可以欺其方之類，多數畀老闆搵笨，做足一世，尚算溫飽，但冇錢退休。好少有韓公一類，當打時人工高過布政司，年尾收老闆利是，有五位數字，羨煞同行。其他行家嘅平均薪水，要到《壹週刊》出現之後先至多得肥佬黎扯高咗。
二十一世紀嘞，傳媒人不必好似社長P咁有義氣，一定要學識一分錢，一分貨，月尾收唔到稿費，立即輟筆，做記者收唔到人工，立即去勞工處投訴，點解要畀人搵笨呀！聽老叔父講，審計署審核港台支出，審咗成年，先至搵到一啲皮毛小事如買飯盒，司機買報紙等等，假如審計署外判呢啲工作畀電視台舊老闆做，兩日就搵到一百條慳錢妙法啦，淨係廁紙都慳番唔少，飯盒更可削除。審計署要領教過一啲傳媒老闆嘅手法，先會知道乜嘢叫做「善用資源」策略，係政府機構冇法子可以實施嘅。在某些老闆眼中，傳媒人唔識講錢，可以恰得就恰。