掃波衫：車仔波衫冧價　球迷呻笨

掃波衫：車仔波衫冧價　球迷呻笨

距離世界盃唔夠1個月，歐洲各大聯賽踢埋呢2個星期就收爐，煞科在即，聯賽波衫即時冧價，一來清貨，二來好讓未來個幾月專攻世界盃市場。「冧價正路吖。」你講得中，但邊隊冧價冧得最勁你未必估到，答案係蟬聯英超冠軍嘅車路士，5折有交易，即場印埋球員Number字減多$60，搞到早買嘅球迷呻笨，未買嘅球迷開心到飛天。

記者：陸伊琳　
攝影：楊錦文、周旭文　
模特兒：阿Lo、Chrissie（PureModels）

必撐曼聯主場波衫

同我一樣憎車仔憎到入骨？唔緊要，英超曼聯、阿仙奴、愛華頓同紐卡素等波衫都有得減。我認我係曼聯躉，有偏愛，只此一件嘅曼聯主場波衫必撐，其他較冷門嘅荷甲聯阿積士、飛燕諾波衫亦6折起發售，數量有限售完即止，要搶快手。

■下季再見唔到曼聯件衫上有vodafone字樣，因為已改由AIG贊助，好怕到時睇唔慣。呢件曼聯9號主場波衫只此一件，原價$459，特價$349。

6折！
■飛燕諾主場波衫原價$499，特價$299。

■飛燕諾作客波衫原價$499，特價$299。

■阿仙奴會着呢件黃色作客出戰歐聯與巴塞對戰，原價$459，特價$399。

■曼聯作客波衫原價$459，特價$399。

■紐卡素作客波衫原價$420，特價$299。

■阿積士作客波衫原價$420，特價$299。

■阿積士主場波衫原價$420，特價$299。

■愛華頓主場波衫原價$439，特價$299。

即場熨字減$60

車仔喺摩連奴帶領下蟬聯英超冠軍，難怪佢囂張到出本《Mourinho:TheSpecialOne》嚟耀武揚威，仲寸到話：「這裏只有主和在主之後的我！」無計吖，球隊成績確實好，搞到各大廣告商心甘命抵贊助，除Samsung肯畀龐大贊助費續約車仔，adidas亦發功成功爭取到來季車仔球衣贊助權，球迷下季見到嘅車仔波衫再唔係Umbro，而係三間adidas。
車仔出年轉贊助商，球衣店「352大本營」就趁機去貨，老闆Roy話：「捧盃後，車仔波衫銷情有增無減，由日賣幾件勁增到日賣20件，我見舖頭又6周年紀念咯，咪揀件車仔100周年紀念主場球衣冧價囉。」點冧法？4折有交易，即場熨埋球員Number字再減$60，勢必成搶貨目標。

■車仔主場波衫原價$439，特價$279，即場熨埋字，再減$60，擺低$219可以拎走。

■車仔最受球員8號仔林柏特，歐聯、英超熨字$165起。

■車仔作客波衫原價$439，特價$299。

■上屆車仔長袖作客波衫原價$539，特價$299。

球迷：後悔早買

352大本營（27707352）
地址：旺角西洋菜南街38-40號萬高商業大廈9樓

喬喬：「一開季我已經買咗車仔波衫，不過唔驚，我係車仔Fans，買多件當做紀念喇。」

阿歷：「我捧開阿仙奴，不過車仔件波衫減到$219又真係好抵，會考慮買。」