衞詩、車婉婉、孫耀威、鄭希怡同埋吳卓羲等藝人噚日去到港台，出席「香江暖流向母親說愛」活動，此外柳影虹、楊婉儀同李曾超群亦有到場。
衞詩話早前患病嘅媽媽會喺韓國返嚟，同佢兩姊妹過母親節，佢仲話計劃到時同家姐衞蘭請媽媽食日本菜兼帶佢去最愛嘅名店CHANEL揀禮物。
期望有奇迹
提起母親節，柳影虹講到佢88歲嘅媽媽早前驗出有膽管癌，仲入醫院住咗3個月。因為媽媽有失禁嘅情況，所以柳影虹每日都要幫佢換尿片同抹身，佢話好希望有奇迹出現，再同媽媽過多幾年母親節。
孫耀威噚日成個病樣，原來佢呢排為咗減肥，經常暴曬做運動，前日仲由早上10點打高爾夫球打到下晝5點，終於搞到中暑。