在這個Download年代，我們都得問一句：「CD已死？」，據觀察，20歲以下的年輕人已甚少在唱片店消費。有言再過幾年，CD將會只淪為中年人的收藏品，若真如此，伴你每一個夜晚看着哼着歌詞的CD封套，將會從此消失，而變成了電腦螢光幕上的一個小小Icon。可惜嗎？形勢比人強，大氣候無人能擋，且看看唱片封面設計師及樂評人，在CD送葬前會選擇哪些作品長伴左右！
記者：曾冠輝
攝影：陳盛臣
問題
Q1.回顧聽CD的日子，請選3個CD封套作收藏。
Q2.怎樣才是一個好的唱片封套？
Q3.CD封套擔當着甚麼角色？
封套設計師Matt：「聽歌手感好重要！」
Q1：林憶蓮《夢了、瘋了、倦了》、Madonna《LikeAPrayer》、米倉利紀《Flava》
Q2：「只要唔肉酸已經係一個好封套，如字型唔靚，已經令到一個封套唔好了。最重要是『適當』。」
Q3：「CD封套，係為咗吸引人買嘅包裝。」
Eason：哥哥《Salute》封套印象深
問到Eason最喜歡哪一張CD封套，他毫不猶豫選了自己最近的專輯《LifeContinues......》：「呢張專輯由歌曲到封套整個概念都係自己構思，係一張好個人嘅CD，記錄咗我嘅生命，封套裏面嘅相都好生活化，甚至有啲相係我用手機影嘅，所以好真實，亦配合到專輯內嘅主題。」而別人的唱片中也有喜歡的封套：「張國榮《Salute》封套藍色嘅色調令我好想去聽吓裏面嘅音樂係點，再加上張國榮個樣又有型，令我對呢張唱片封套嘅印象好深刻。」
作為歌手，CD封套於Eason又為何物呢？「CD封套可以拉近歌手與樂迷嘅距離，聽到歌手嘅聲之餘亦見到歌手嘅樣，當然現場演繹永遠係最好，但歌手唔可以經常開演唱會嘅時候。CD封套就可以係替代品！」
阿芝：每次睇《StrangeDays》都有新發現
阿芝喜觀TheDoors的音樂，而她最喜歡的CD封套亦是其作品：「《StrangeDays》封面同封底兩張相營造咗個好奇怪嘅氣氛，雖然街上嘅人好似好歡樂咁，但出嚟嘅感覺好不安，好似TheDoors嘅音樂風格；最厲害嘅係每次睇個封套都會有新發現，好似永遠都睇唔透咁。封套嘅攝影師係JoelBrodsky，佢係出名嘅搖滾樂隊攝影師，樂隊嘅唱片封套相主要都出自佢嘅手筆。」
樂評人袁智聰：「CD封套好好玩！」
Q1：Plastikman《SheetOne》、Spiritualized《PurePhase》、Flipper'sGuitar《TheDoctorHead'sWorldTower》
Q2：「實用、易開、有心思，又配合到唱片主題嘅就係一個好封套」
Q3：「封套令到一張好嘅唱片錦上添花。」
樂評人袁智聰見證了由黑膠過渡至CD的年代：「以前黑膠封套咁大個，一張靚相做封面已經好震撼；到後來CD封套比黑膠封套細咗好多，局限大咗，但到90年代開始多人花心思玩封套，形式唔再局限喺膠盒加書仔，而係由玩CD盒物料到玩3D嘅都有。」他選的3張唱片封套正是發行於90年代的不同時期，分別有用夜光物料的CD盒、仿毒品紙的封面紙及配備立體眼鏡及立體相的封套。
本地的唱片封套又如何？「本地封套一般都大大盒，脫離咗由黑膠縮細到CD嘅原意……本地嘅，我揀林海峰嘅《Goodtimes》，封套有立體嘅手感，封面色彩豐富，似反映壞時代下對好時代嘅睇法，同唱碟主題好配合！」
設計師Eunice：「封套始終唔會死嘅！」
Q1：Suede《ComingUp》Single系列、Spiritualized《LadiesAndGentlemenWeAreFloatingInSpaceBP》、HappyMondays《Pills'n'ThrillsAndBellyaches》
Q2：「好封套最重要係整體，由封面以至CD面都要配合，而設計更要同歌手風格一致。」
Q3：「歌手就好似一個品牌，CD封套就係包裝一個歌手，幫佢建立一個品牌形象。」
已從事唱片封套設計10年的Eunice，主要為非主流歌手工作，作品有人山人海一眾樂手（如at17《KissKissKiss》）。她說為他們設計封套自由度大，但較辛苦：「偶像派歌手封套內7至9成都係Sell樣，跟足唱片公司要求影靚啲相就可以，比較容易完成，但無乜發揮空間；相反為非主流歌手可以發揮嘅空間較大，自由度高，可以注入較多自己嘅構思，會辛苦啲，但滿足感會大好多。」
Eunice與Matt一樣喜歡邊看封套邊聽歌，她堅信封套是不會消失的：「將來CD可能會被取代，但包裝係必須嘅，例如唱片公司可能會出啲PrepayCard（預繳卡）喺便利店賣，樂迷買一張返屋企上網入密碼就可以Download歌，但PrepayCard一樣需要包裝，屆時封套一樣大把嘢玩。」
