新加坡搞獨裁叻過共產黨，雖然由李氏嘅人民行動黨玩晒，但至少都有一兩席畀啲反對黨。就嚟連任嘅煲呔唔知係咪想向李光耀父子偷師，將連任政綱由強政勵治改做一黨專政？事緣煲呔會喺7月15至17日訪問新加坡，外訪個牌頭就係，研究新加坡嘅政治制度、點樣培養政治人才喎！
如果煲呔搞得成一黨專政，佢實搞個公務員黨、AO黨，或者索性煲呔政府黨出嚟，唔通益你哋民建聯咩？但下屆有冇機會搞，就真係要睇睇，中央畀唔畀煲呔踢走唐唐，然後搵個鬍鬚曾咁嘅AO，接肥龍班做政務司司長呢？話晒CS個位好重要，因為就連中聯辦都話，如果07年做到CS，2012年做特首就「順理成章」囉，繼續由公務員出掌CS個位，至少代表阿爺唔介意，繼續畀公務員揸晒啲權啦。
北京有戒心 不如搞淡馬錫
不過呢一刻，北京對「政黨」呢兩個字仍然好有戒心，就連特首有政黨背景都唔得，修訂都唔可以提，阿爺一日唔畀，煲呔嘅政府黨唔好話胎死腹中，就連交媾受精嘅機會都冇！
既然連一黨專政都搞唔到，煲呔不如學吓新加坡點搞經濟好過啦！話晒坡仔冇咁多盈餘都派錢畀市民，外滙儲備又節節上升，最近仲爬埋香港頭，多得人哋搞咗間淡馬錫，專門去外國揀好嘅投資，上年入股建行賺到盤滿缽滿，今年食過番尋味，又入股中行，呢樣先至值得學習，煲呔應該叫任總唔好再霸住啲外滙基金，香港都應該搞番間淡馬錫，幫外滙基金賺多啲回報好過。到時做少一半工作嘅任總，更加大條道理減人工啦！
探訪小學生 冇順便講出貓
新加坡就兩個月後先去，噚日，煲呔就同即將調職嘅飯焦去咗嘉諾撒聖家學校（九龍塘）探訪，煲呔讚啲小學生兩文三語、數學能力好，但佢就冇順便勸班學生考試要誠實。最近好多學生出貓作弊，大學生、會考生都係咁，話晒德育都係要從小教起，既然去到學校，好心煲呔就提吓啲學生唔好出貓啦！
傳真︰2623-9278
電郵︰[email protected]