美股唔妥，日股唔掂，港股跟埋。恒指跌238點，收16901，1周埋單唔見112點。都好，填補上周三嘅上升裂口，又令個市冇咁超買。9RSI本周初挨近80嗰頭，昨日回番到52。美股如果定得番，港股遲吓又再玩過。
歐元兌美元C輪9665：近排美金跌到好似斷線紙鳶。兩個幾月前，歐元兌1.183美元，𠵱家1.290。歐元兌美元C輪9665翻生，由上月低位2.1仙，到昨日升到17.4仙，升幅720%，淨係昨日升幅已經102%，做咗輪王。
9665溢價0.27%，槓桿率57.4倍（有效43.5倍），引伸波幅12.7%。睇數據，好似仲係夠晒爆炸，只不過隻輪已近黃昏，下周二最後交易。冇乜人發財，隻輪街貨得2.7球。如果係5月登場以發行價27仙揸到𠵱家，仍然蝕水。如果繼續睇淡美金，博同類C輪9884，7月上旬夠鐘，輪價61仙，溢價1.5%，槓桿率16.4倍（有效11.6倍），引伸波幅22.5%。
不過，賭呢類雜嘜窩輪，要有心理準備買賣困難，可能綁住發達，亦可能綁住PK。
日經指數C輪9934：日經指數散260點，已低過恒指300點。博日股反彈，9934諗得過。
9934喺9月初夠鐘，輪價49仙，溢價1.3%，槓桿率9.1倍（有效7.5倍），引伸波幅21.3%。昨日成交得72萬份。同類輪9987交投多啲，有2.3球，昨收57仙，差不多同時夠鐘，但數據冇9934咁靚，溢價高些少。
章盛