舊年10月14日，秋風剛起，陽澄湖大閘蟹剛登場，寫過1篇嘢，標題「半隻大閘蟹，一手安利時」。當日，安利時投資（339）每手貨2.5萬股，股價1.2仙，只值300元，攞去天×樓堂吃大閘蟹，只能換得半隻。
7個月下來，經過供股與合股後，每手1萬股，按盤價0.124元，1手貨值1240元，可以喺蟹季再來時，到天×樓換兩隻半大閘蟹。
只不過，全隻（或成隻）安利時，市值只係1004萬元。大坑徑名門最巴閉單位「意向價」據稱1.30億元，呎價3.3萬元。單位咁豪，主人睡房「應佔面積」斷估都超過600方呎，即係價值喺2000萬元以上。所以，今日篇嘢標題叫做「全隻安利時，名門半間房」。
■安利時發行股數8100萬股，市值約1000萬元，原來唔係本港市值最細嘅上市公司，只能「屈居」No.5（見表）。港股上周大鑼大鼓慶祝市值升破10萬億，股民歡騰，但另一邊廂仍有市值如此不堪嘅上市公司。
港股「5小」，總市值不足4000萬元（尚欠20萬元）。和記黃埔（013）霍建寧大班，去年收取薪酬總共1.3096億元（其中1.19億元係花紅）。「5小」市值若然用作出糧給霍大班，原來唔夠4個月用。
■安利時係根據港交所（388）上市規則Chapter21成立嘅上市公司，即係「炒人哋股票」嘅股票。00年7月以每股1元招股，兩年後1拆5，今年年初完成1股供8股，40股合1。集資600萬元（已減費用120萬元）。若然唔係集資，市值只係得幾百萬元。公司掛牌6年，年年蝕，總共唔見3050萬元；見紅數字仲大過現今市值兩倍。
安利時有投資港股，最重手的是瑞源國際（476），N年前買入19.1球，總成本620萬元，每股0.32元。瑞源業務是買賣物業、金屬及礦物，現價6.7仙，安利時的投資蒸發了8成。所持其他港股有非常小量的中移動（941），及首長國際（697）。
董事人工平過清潔工人
■安利時或者有一點作風不錯嘅，就係董事支酬金非常克己，7名執董與非執董，去年共只支34.56萬元，每人「月薪」平均4114元，低過清潔工人。
●安利時按月公布每股NAV，3月底為0.41元，按盤價0.124元有折讓70%，即P/B0.30元。值不值得「炒折讓」？沒有意見。
博賣殼？嘥氣。根據上市規則Chapter21上市嘅公司，業務規定唔能轉型，「殼價」因素不必考慮。
何車