潮流講增值，不論個人或公司，都要不斷諗辦法自我提升。新世界旗下嘅富城集團，將今年定為「物業優化年」，即係要延長顧客物業嘅壽命同埋提升物業嘅價值。白啲講，就係為物業做維修保養囉，令物業嘅設施追上時代發展，外形就靚靚仔仔咁囉。
雖然話今年係優化年，但原來有啲大型屋苑一早已經做緊嘢，好似沙田第一城就喺02年開始咗逾億元嘅外牆勘察維修工程，今年底完工。
而老牌屋苑荔枝角美孚新邨就會分期髹外牆同換外牆喉管工程。
富城董事總經理鄭錦華表示，集團仲會為顧客度身訂做多元化增值服務，如為住宅提供免費室內鋁窗、沖廁水箱及閘掣檢查，同小型維修服務。個別物業仲會增加大型郵件寄存，同代訂鮮花時果等服務。