詩姐風塵僕僕，喺華盛頓見完美國政界之後，又即刻轉戰紐約，同商界見面，噚晚喺紐約律師會演講。雖然講題仍然係一國兩制的實施，但內容就改咗講CEPA，講吓香港法律界點樣受惠。
到咗答問時間，詩姐特登主動提出，叫台下觀眾可以問CEPA以外嘅嘢，好似人權、23條咁。八方前日質疑佢唔講呢啲外國人最關心嘅題目，發揮唔到佢哋此行目的，估唔到詩姐進步得咁快，識得主動出擊。台下果然有位金融公司總裁UweBott問佢，基本法賦予終審法院終審權，但又畀人大可以釋法，咁咪好多衝突？詩姐回應話，受慣普通法訓練嘅律師都會覺得人大釋法有啲難理解，因為普通法下法律係由法院詮釋，但基本法賦予人大有權解釋基本法，解釋咗之後香港法院就要跟住嚟判案，就好似國會修改完法律後，法庭要跟住修改咗嘅法例判案一樣，所以唔會有乜衝突同矛盾咁話。
八方後尾問番UweBott，詩姐嘅解釋說唔說服到佢，佢好坦白咁話：「好難。」因為佢始終覺得人大釋法會削弱香港法治。
傳真︰2623-9278
電郵︰[email protected]