李嘉誠系啲公司，近日真係喜事頻頻。先係老爺超人卒之有粒「慈菇蒂」孫仔，遠房啲就係TOM仔個CEO湯美娟，下個禮拜二會出嫁做麥太，真係恭喜恭喜！仲有幾日就做人太太，TOM一姐𠵱家心情係點？佢話好開心終於嫁得出唔使攝灶罅，咁講實在太謙啦！
湯一姐話晒年薪過千萬，賣相又唔差，但八方最欣賞係佢心地好，每年撥一筆錢以無名氏捐畀一個慈善基金，然後畀秘書負責發辦，揀捐畀邊個，真係冇得頂！咁禮拜二嗰日會點搞呢？中午先喺文化中心註冊，夜晚包場跑馬地Amigo，貪嗰度可以兩個人一張枱又得；六個人一圍又得，唔似傳統酒店咁限住一圍圍要啲賓客同唔熟嘅人坐，真係諗得周到。
咁點解唔選用證婚人上門呢種新服務？TOM一姐話，因為排期嗰陣未有呢樣嘢囉！至於有冇畀帖TOM仔大股東超人同埋周小姐？呢個係秘密唔講得喎！咁如果大家想知，星期二去文化中心同Amigo門口八吓咪得囉！Bytheway，八方都有樣嘢要多謝佢，就係八方都未試過去股東大會有嫁女餅食，真係好sweetsweet啊！
傳真︰2623-9278
電郵︰[email protected]