一本免費周街派嘅雜誌有DiorHomme「提拔」過嘅新進樂隊專訪、有多達5輯水準不俗嘅時裝造像、有幾位時裝設計師同Graphic人專訪，有Clubbing熱點推介、有樂評、有影評……可以說，一本要錢買嘅雜誌內容，佢有，甚至水準猶有過之，自己都叫搞過吓免費雜誌，睇見人哋搞得有聲有色，慚愧之餘實在要表揚一番。又俾你估吓呢本《FL.ag》來自邊度？倫敦？東京？紐約？統統唔係，係新加坡。
無錯，係一個從來唔覺得佢「有時裝」嘅地方，乾淨整齊得叫人納悶。筆者出差去過幾次，每次都覺得無啖好食、無度好去，唯一可取是MusicScene叫做比香港多元化一點，至少夜晚可以去蒲。聽老友講，唔單止呢本《FL.ag》，連類似《HKMagazine》、同一出版集團的新加坡版《SGMagazine》也做得比香港版好，以小觀大，照睇新加坡有咁出色嘅刊物，點解個城市仲咁悶嘅？有無高人可以答到我？