港股位高勢危，淡友一見到美股有些少風吹草動，噚日即在市前交易時段玩嘢，曾將即月期指叫價壓低逾700點，如果唔知情真係隨時畀佢哋嚇死。雖然大家明知期指及港股唔會大幅低開逾700點，但已經令投資者神經變得緊張。港股跌238點，收報16901。
港交所（388）股價主要睇大市成交，唔多睇大市升跌，昨日股價一度衝上65.80元，再創新高，收64.60元，升1.89%。
聯合財務值70億
新鴻基公司（086）停牌，傳以35億元向聯集（373）收購50%聯合財務股權，即係話聯合財務總值70億元。新鴻基公司計劃配股集資17.5億元，另發債17.5億元來支付收購。據聞出售聯合財務係聯集系內重組的其中一步，日後新鴻基公司會集中做金融服務。
早前提過有傳聞話新鴻基公司持有港交所接近5%股權，約5000萬股，但有知情人士話應該冇咁多，約持有1400萬股，最近仲好似減持咗200萬股，現時只持有港交所1200萬股左右。
越秀投資（123）大股東越秀企業以每股1.81元批股，配售1.34億股畀3個國際知名機構投資者，套現2.43億元。本來呢類消息通常都刺激股價急升，不過越投冇披露投資者身份，加上傳出內地將買樓首期由20%調高50%，令到房地產股遭拋售，越投大跌5.9%至1.76元，呢三個不知名投資者即時要損手。
阿虎