玉皇朝（970）搞漫畫多時，最近終於修成正果，獲投資界認同，陸續有芬佬埋位，除咗日前公司以每股0.73元配售4000萬股予兩個基金外，最新又見有一家韓國基金向聯交所申報，揸咗多過5％股權。
經紀黃話，芬佬睇中玉皇朝，除咗因為旗下卡通片《神兵小將》即將在中央台播映外，最緊要係周邊產品同相關版權費，所帶嚟嘅收益好有想像空間。因此昨日大跌市，但玉皇朝可以逆市升8.97％，收0.85元，再創52周新高。
除咗玉皇朝，市場仍有唔少二三線股逆市炒上，有啲重係可以列入「估佢唔到咁都得」一類。其中一隻都係日前公布配股的先科國際（724）。先科一名前董事牽涉的case，家陣重未審完，但似乎完全唔影響到公司。
隻股日前成功以每股0.90元配售5800萬股，前日勁升30％，昨日又升6.9％，收1.39元，有幸得配股份的投資者，可以過一個快樂周末。
慕容小初