靚女係特別得人歡心嘅，唔能夠下下妒忌得咁多。82年出世，今年仲要未生日，即係23歲，可能深田恭子早出道，令好多無知之徒以為佢年紀有番咁上下，所以睇完《富豪刑警2》後鬧人哋扮可愛喎。鬧人之餘，仲大膽到作狀學人哋喺劇中嘅動靜，呀，唔係學，係醜化！見到咁嘅場面，人唔鬧狗都一定會吠！好彩呢件事發生喺室內，如果個天喺佢頭殼頂，我深信會行雷，旱天雷！
講番套日劇，靚女擔正唔在講，有懸疑有解迷有搞笑有鋪排，製作絕對認真。唔好講到咁深，簡單嚟講，唔好睇唔受歡迎都唔會拍第二集啦，你估《雀聖》咩？23歲，絕對可以繼續扮可愛，同埋我想講，人地樣貌標致有肉地，唔扮都已經可愛。我明嘅，我都妒忌金城武靚仔，不過我接受現實，所以無喺人哋面前話金城武扮有型。（p.s.寫Blog唔係為興趣，係為部免費戲《SilentHill》。）