今個月頭，發展商貨尾盤突然大減價清貨，搞到個市好混亂，但可以肯定嘅係，二手市場相當慘情，唔少趕住賣樓嘅業主，都被迫要將就吓，減番啲至得。
究竟情況係點，睇吓中原城市領先指數就最清楚嘞。
截至5月7號，指數報53.5點，比之前一周嘅54.13點，冇咗0.63點，幅度達1.16%，係舊年12月4號一周（跌2.1%）以嚟最大跌幅，而且仲係連續第三周下跌㖭，係05年12月4號連跌4周後，最長嘅一次下跌浪。
睇番嗰62個成份屋苑，有42個呎價低過上月同期，係近月罕見。但稍為令人安心嘅係，跌幅都喺一成以內，跌得最多係柴灣杏花邨嘅6.87%，呎價剩番4043蚊。而天水圍嘉湖山莊都跌咗6.45%，呎價低見1734蚊。
傳再有貨尾劈價
中原話隨住一手樓減價風潮收斂，相信指數跌幅會收窄。但係噚晚市場又再傳出有更多貨尾盤劈價，咁睇嚟未來幾個禮拜指數走勢係點都唔使多講。發展商減價散貨，係二手業主最難抵擋嘅招數，除咗鬥劈之外，仲可以點呢？
電郵地址：[email protected]