夏天到，又係瘦身高峯期，唔知各大瘦身公司今年又搵乜水着比堅尼做代言人呢？比堅尼喺泳裝界永遠佔神枱地位，你估乜人都可以亂着㗎？成功瘦身嘅不知名師奶固然嚇親街坊，搵年紀有番咁上下嘅程可為同薛家燕做代言人一樣趕客，我就希望個個代言人都有鍾麗緹咁嘅質素嘞，不過有街坊居然話最想睇譚玉瑛姐姐個BikiniLook喎，吓？唔係嘛……睇我好過喇！
記者：黃藹瑩
攝影：周旭文
模特兒：Creamy
泳衣提供：Quicksilver&Roxy
甘草多人撐
愈來愈多姊妹敢着比堅尼，我都決定買番套跑沙灘賀一賀佢。我樣靚身材唔正就話預咗無仔昅啫，咁一眾街坊又最想睇邊個着比堅尼先？烈日當空下做幾十個街訪，發現人人心目中嘅比堅尼女神都唔同，怪就怪在有位哥哥仔，居然對譚玉瑛姐姐存有幻想，唔通係睇咗《老馮日記》以為王敏德嘅性幻想對象真係譚玉瑛？另外亦有街坊對一眾甘草有喜好，余慕蓮、白茵、陳寶珠、盧苑茵嘅比堅尼Look全部有市場，仲話：「寧願睇年過半百嘅甘草比堅尼Look，都唔睇未夠20歲嘅欣宜着比堅尼！」唔使講到咁絕吓嘛？
問題
1.你最想睇邊個着比堅尼？點解？
2.你覺得邊個着比堅尼最掂？點解？
3.着比堅尼，介唔介意俾甩麻仔昅？你又會唔會昅人着比堅尼？
騎呢之選
1.譚玉瑛姐姐。無乜點解喎，純粹好奇心囉。
2.李蘢怡。身材好個樣又掂，最雅俗共賞。
3.去得沙灘都係為昅女，着得比堅尼都預咗俾人睇喇，我會明昅㗎。
1.余慕蓮喇，成日話余慕蓮個樣唔得，話唔定身材好掂呢？我想睇呀。
2.廖碧兒個樣夠Sweet，身材又好。
3.我着唔起比堅尼，其他女仔着得好睇嘅話我都會望兩眼。
1.沈殿霞，肥姐着比堅尼一定好笑，好想知件比堅尼要做到乜嘢Size。
2.Danielle係所有人心目中嘅女神，我係女仔都好羨慕佢。
3.自己唔敢着，不過去得沙灘就梗會望人，着得好睇都會望兩眼。
1.小儀！咁細粒，唔知着比堅尼之後會唔會扯高佢個人？
2.Isabella啦，佢着比堅尼都有清純感覺，好少女仔着得咁好睇，好難得。
3.女仔着得比堅尼但係又無人望，一定好失望，我實昅㗎，咪令人難堪嘛。
正路之選
1.楊千嬅喇，始終佢出道咁耐都無着過嘛。
2.李彩華喺脫毛廣告入面着Bikini好好睇。
3.我唔會着比堅尼，都好少去沙灘，如果真係着，講真都怕俾男仔望。
1.可愛教主楊丞琳着比堅尼一定Cutie。
2.樂基兒喇。佢有自信吖嘛，拆咗彈身材都咁好睇。
3.女仔着比堅尼，男女都會望；男仔着三角仔泳褲我都會望喇。
1.衞蘭，覺得好襯佢鬼妹仔形象。
2.隆胸之後嘅樂基兒啦，個樣又甜又着得好睇。
3.唔會試着比堅尼啦，身材要好好至得，不過當然有望過人着啦。
比堅尼小史
巴黎泳裝設計師LouisReard喺1946年，設計出僅遮蔽胸脯與下身部份嘅兩件頭泳衣，咁啱當年美軍喺太平洋馬紹爾群島附近嘅比堅尼環礁試爆原子彈，故將呢個爆炸性暴露設計命名為比堅尼。比堅尼喺六、七十年代極流行，象徵女性身體自主大解放，唔少女星如瑪麗蓮夢露都勁鍾意着。
