唔少豪宅業主趁市旺賣樓，噚日幾宗成交，幾乎都賺錢離場，賺得最多嘅係西半山輝煌豪園高層E室，面積1175呎，成咗1088萬，呎價9260蚊，美聯干德道分行區域經理歐志浩話，原業主02年底以725萬元購入，揸4年勁賺363萬元，高達五成。
其次係南區豪宅淺水灣嘉麟閣，利嘉閣山頂及南區區域經理陳詠嫻話，有1780方呎嘅2座中層A室，啱啱賣咗1950萬元，呎價10955蚊，原業主喺96年以1610萬買入，揸10年賺340萬，超過兩成。
賺得較少嘅有兩單，其中大潭陽明山莊5座中層41室，1308呎，賣咗1050萬，呎價8028蚊，原業主99年以975萬買入，7年間轉手，賺近8%，75萬。