噚日蘭西先講緊葵涌工廈多人炒，今日輪到講粉嶺，兩個區有啲相同之處，就係區內仲搵到啲落後大市嘅貨。
好似安樂村安居街21號粉嶺工貿大廈2樓7至11號室，樓面有成5789方呎，連7個車位，有投資者斥342萬一併掃入，若果撇除總值大約140萬嘅車位價錢，其實單係工廈部份呎價只係349元，相當吸引，相比同區工廈平均呎價500蚊平一大截。
聽講上述入貨嘅投資者，一直係區內用家，佢見工廈租金係咁升，呎價就落後大市，計落回報率會愈嚟愈吸引，所以就買批貨嚟收吓租。呢類亦都係典型投資工廈嘅古仔，即係由用家變炒家。咁又係嘅，如果唔係喺嗰區落腳一段時間，就算遇到筍貨都分分鐘唔識寶。