內地3隻保險股，中國人壽（2628）同平安保險（2318）升勢強橫，噚日再創新高。國壽最高12.35元，收12.15元，再升0.35元；平保最高24.20元，收23.85元，升0.10元。中國財險（2328）收2.85元，雖亦升2.5仙，但就係3股之中最落後嘅，中財險上月中高價3.525元，現價比高價仍低近20%。
中財險落後，當然有佢嘅理由，就係05年（12月年結）嘅盈利比市場預期為少，股價因而在宣布業績後大幅回落，但低到呢個水位，可說跌過龍。就睇往績PE，中財險29.4倍，都遠比國壽的35.8倍同平保的36.2倍為低，至於06年，由於中財險的盈利增長會大幅改善，預測PE會比國壽和平保低好多。
再睇市賬率（P/B）。05年底，中財險賬面NAV1.51元，P/B1.88倍；國壽P/B4.16倍，平保P/B4.61倍。中財險與國壽和平保相比，P/E低出5成半至6成。
今年盈利將大增
再睇中財險盤數，05年獲利11.13億元（人民幣．下同），激增7.3倍，但中期已賺8.89億元，下半年盈利只得2.24億元，又唔派末期息，令股東不滿，引發拋售。但06年，整體情況對中財險好有利，最主要係汽車保險的核心業務，由今年7月1日開始，將實施機動車第3者責任強制保險，而擁有50%市場份額的中財險，肯定係最大受惠者。
仲有，短息上升及銀根收緊有利投資收益，意外損失索償率亦已大幅回落（由1年前的86%落到69.6%歷史低位），加上所得稅稅率會下調，中財險盈利將大增。高盛證券最新研究報告指中財險近期股價下跌，正好提供買入機會，並將其06年盈利預測調高11%至19.5億元，06、07及08年每股盈利預測為0.19、0.24及0.29元，06及07年預測PE分別為15倍及12倍。國壽及平保06年預測PE約23倍及26倍，中財險相比仍好吸引，應可收復失地，目標價3.50元。
中財險H股發行34.56億股，機構投資者持股近5成，包括AIG揸31.92%，摩根士丹利有9.45%，Matthews有6.03%，大基金近期未見減持，顯然對中財險仍好有信心。
郭兆誠