八方聽聞立法會議員最近不約而同收到秘書處一個通告，叫啲議員乖乖哋，唔好破壞公物。議員梗係𢱑晒頭，唔知秘書處搞乜東東，議員點會整爛議會啲用品呢？
經過一輪明查暗訪，八方終於搵到罪魁禍首，就係成日攞住道具入立法會辯論嘅長毛！話說早排辯論勞工保障問題時，長毛就喺佢個位度不斷敲打一個玻璃做嘅錢罌，點知佢越敲越激動，卒之佢張枱就遭殃，出現咗個深坑。最終呢，梗係要立法會執手尾，用咗成250蚊去維修。
為免再有議員要立法會破費，秘書處惟有先小人後君子。主席范太話今次當係例外，冇打算向長毛追討賠償，但就下不為例，日後再遇到同樣情況，就要真金白銀自己賠，立法會唔會包底。唔知長毛下次喺議事堂搞嘢，會唔會因為驚住要賠錢而細力啲呢？
傳真︰2623-9278
電郵︰[email protected]