無綫收費電視搞咗個娛樂新聞台同有線電視打對台，早前已經招兵買馬，噚日就正式公布開班授徒，由譚詠麟、楊采妮、利嘉兒呢幾位星級教師主持開學禮，每人手揸一個水壺，準備淋花，寓意要好好栽培呢班學員，點知老頑童譚校長揸住個水壺向前係咁射，司儀就話：「校長已經急不及待係咁射，仲射得好遠。」校長即刻好爽回應話：「係啊！有心有力嘛！」搞到全場都忍唔住笑。
乖仔冇追細佬
一句「有心有力」，就畀機會記者打蛇隨棍上，有人第一時間問校長既然有心有力，係咪諗住生多個？譚校長知道開錯咗個頭，又唔好意思唔答，就係咁話：「多謝晒！唔使客氣。」但大家仍一再追問，佢就尷尷尬尬咁話：「冇諗過呢個問題，又唔係玩具。」
然後校長就大耍太極，將手一指，竟然想轉話題講記者條褲，結果梗係唔成功，仲俾記者追問校長個仔有冇要求要個細佬，譚校長只好笑住話：「唔聽佢講，學校好忙，好多嘢學，多姿多采生活，唔會悶。」
