今年E3特別多嘢睇！隨着任天堂及SONY先後公布喺11月會推出Wii及PS3之外，喺E3入面，亦同樣有大批新Game俾入場人士先玩為快！起碼有10隻新作於今年底蒲頭，大家就唔使愁到時會有機冇Game打啦！比起去年E3甚至TGS嚟講，雖然今次叫有睇頭好多。但由去年至今，早就曝光嘅《MetalGearSolid4》，依然得段動畫止咳，好彩就比早前更詳盡，睇到Snake吞槍自殺一幕，現場人士當堂嘩一聲，真係驚喜、好期待！
記者、拍攝：陳國輝
今屆E3同往年一樣，SONY和任天堂展館依然係得一「道」之隔，排完任天堂再行過SONY，夠晒方便！同舊年唔同嘅係，今次大家再唔使排長龍睇PS3Dummy機，佢擺正喺會場中心，大家可近觀之餘，隔籬仲有多部「超級電腦」模擬PS3運作，俾現場人士試玩！最緊要嘅係，因為機嘅數量多達50、60部，小記排隊玩咗隻《VIRTUALTENNIS3》亦只係花咗10分鐘左右，不過每隻Game得一關試玩，為咗控制咁恐怖嘅人潮，冇法啦！
本報記者洛杉磯現場直擊
E3全名為EletronicEntertainmentExpo，乃全球最大型遊戲展覽，每年均於美國洛杉磯會議展覽中心舉行。論規模，比東京遊戲展（TGS）差不多大上2倍，參展廠商更係多不勝數。雲集全球傳媒爭相採訪，故各開發商每年均會投入大量人力物力，務求將最新產品資訊帶給全世界，可算係兵家必爭之地，連出名唔參加GameShow嘅任天堂，都會扭盡六壬布置會場，希望能吸引最多入場人士進內參觀及試玩。
偷拍主機介面 勁似PSP
PS3雖然吹咗好耐，不過今次E3終於現真身，主處理器為Cell、圖像引擎為RSX，一樣冇資料數據，可幸現場有用測試機試玩，好似行《GTHD》等一類超大咬的1080p顯示遊戲，都仍然好流暢，感覺真係好強吓！另外就現場公布所知，新PS3到11月實賣時，會有20GB同60GB兩個版本，兩者最不同處，就係60GB版硬碟容量較大外，仲會多加HDMI高清影像輸出、IEEE802.11b/g無線傳輸同MS/SD/CF卡插口等，好似在多媒體娛樂功能方面，有好明顯的質量提升！至於價錢方面，暫知美國定價為20GB售499美元（約港幣$3,892）、60GB售599美元（約港幣$4,672），價錢差唔遠，但60GB就明顯強玩好多！
另外記者在採訪之際，喺無意之中竟然發現職員打開了PS3嘅控制介面，內容包括有睇相、睇戲、聽歌仲有上網，再望真個介面，其實同PSP都幾似，不過當記者再問會唔會每個月都換Theme嘅時候，職員已經禁止小記繼續拍攝，若然單憑猜測嘅話，估計會沿用PSP嘅設計！
機迷點睇？
花絮 模擬打機場景？
今屆SONY雖然主打係PS3，但講到會展布置，就點都唔及PSP咁搶！SONY利用PSP嘅可攜特性，特別模擬出幾處街景，令場館布置更有吸引力。淨係睇佢呢幾處特別布置，就已經知道花咗幾多人力物力啦！
PS3遊戲即場有得試
GTHD1080p顯現強烈真實感
《GT》點玩法大家已經熟到背得出！最新呢集《GTHD》，擺明大賣PS3機能！首先畫質方面，係行盡PS3機能的1,920×1080/60fps，據知靚過舊版《GT4》（640×480）足足有12倍！就現場測試，完成度都相當高，主遊戲介面已包括有街車、開篷跑車及電單車等十多款車種揀，至於可玩的跑道有4條，包括大家熟悉的美國大峽谷及經典東京賽道等，不過畫面完全不可同日而語，跑車有幾靚、光源變化有幾強，大家睇相都可以見到有如CG大電影般厲害！不過記者覺得更強係佢在操控時，所表現的強烈物理反應質感，好似喺沙地賽時，粒粒沙塵沿車身氣流飛捲，簡直有真車感覺！至於場邊的觀眾，今集亦再唔係紙板喪屍，係一個個有反應的真人，實在令人好驚歎PS3的運算能力，真係靚到變態。
不過最令中、外記者目瞪口呆的，還是以1080p的畫質在賽後重播，鏡頭不斷切換，再加強烈的速度及真實感，可以話睇無記澳門賽車都冇佢咁正！
SONICTHEHEDGEHOG3D靚畫走上PS3
身為SEGA成名作之一嘅SONIC系列，話咁快又推出PS3版喇！3D靚場靚景肯定唔少得，動作仲鬼咁流暢㖭！
Alex：場景世界觀大咗好多，全場走，玩Sonic從未咁Free。
HEAVERLYSWORD型爆Matrix慢動作
屬少數以女性為主角嘅動作遊戲！試玩版只提供羅馬競技場一幕，最令人難忘係當主角與敵人作埋身攻擊嗰陣，鏡頭會即時從遠鏡跳至近鏡，仲要好似Matrix咁作出多種慢動作攻擊，睇落已經覺得好型！
Leo：好鍾意呢類打鬥Game，而且吓吓見血腥，好勁！
FORMULA-106傳統賽車靚版
基於傳統F-1賽車玩法，唔愁冇Fans，加埋畫質都提升咗好多！
Ricky：雖然未及得上《GTHD》，但F-1車有另一種像真感覺。
MADDENNFL07超像真美式足球
EA每次推出嘅運動遊戲都以逼真造型為主，基於PS3機能，呢隻美式足球遊戲當然也做到！
Tim：畫質雖然差啲，但係遊戲性同打法，好似真人落場打一樣。
VIRTUALTENNIS3人物動作夠細膩
玩上手其實同VR2分別唔算好大，最特別係當球員作出反手抽擊嗰陣，動作比第2代豐富啲，能擊出嘅角度亦多咗；再睇番Replay時，人物臉部造型更像真，唔講仲以為播緊網球比賽㖭！
Ben：街機剛出咗，PS3上又登場，出機時必買。
GUNDAMMOBILESUIT最立體高達遊戲
雖然試玩版只係得沙漠一關，之不過齋睇高達嘅機身結構，明顯比PS2年代細緻好多，地形以及角色陰影位都做得好真實，甚至乎開始脫離咗以前嗰種卡通感覺。
Tony：唔再玩Seed，出番舊機體有興趣好多。
卡Game搬上螢幕
喺試玩區側邊，其實SONY仲有6至8間獨立試玩室，不過打嘅並非「一般」PS3遊戲，而係後生仔勁Hit嘅卡牌遊戲！呢款名為《CardProfile》嘅遊戲，就好似一般人玩卡Game嘅過程咁，但係當放張卡落感應器上，畫面即出現卡中怪獸，玩家可憑不同嘅手勢去控制佢施法，或者攻擊敵人，最抵死係仲可以不斷升Level，隻怪獸會愈變愈勁，加埋勁靚嘅魔法效果，夠晒過癮！
同場仲有一款叫《SINGSTAR》嘅遊戲，講明白啲其實係一隻卡拉OK遊戲，當你唱完歌嗰陣，電腦會幫你評估，不過遊戲機加入卡拉OK玩法都唔算新玩意。
PROFILE
