孫柏文今日想問大家一個非常簡單嘅問題，就係如果你係一個產品服務供應商，而你喺市場裏面賣緊嘅產品服務，你同啲對手基本上是一模一樣。你同你啲對手鬥嚟鬥去都係鬥價錢，同埋啲冇關痛癢嘅花招，咁𠵱家，突然間有人畀機會你，好合法同好合理咁，花少少錢同出少少力，就可以令到你嘅產品服務，喺消費者眼中，比其他供應商絕對優勝。甚至乎，你花咗少少錢同出咗少少力之後，個市場裏面最中堅嘅消費者，不但覺得你嘅產品優勢，仲要覺得你公司係一間有正義感嘅公司。
亦因上述兩個理由，消費者若蜂擁而至，令你發大達，咁孫柏文問大家：「你會唔會花呢啲少錢同出呢點棉力呢？」作為《金手指》fan屎嘅你，都一定會答：「白癡都會啦，仲問？當你啲fan屎儍㗎？」聽到大家咁樣嘅答案，作為你哋好崇拜嘅偶像，孫柏文都好開心。不過，今日真係要用隻金手指，幫大家篤一班就連白癡都不如嘅人出嚟。佢哋就係香港四大互聯網寬頻服務供應商，榜上有名嘅包括有：和記環球電訊、有線寬頻、電訊盈科同香港寬頻。
出賣顧客
大家諗吓，互聯網寬頻服務基本上係一模一樣，乜M物M嘅速度，垃圾嘅服務態度，非常取巧嘅收費方法，喺四大互聯網寬頻服務供應商當中，邊度有分別？不過，噚日睇新聞報道，話佢哋被高等法院頒令，被迫要交出啲擺電影、音樂上互聯網被人抄嘅客戶私人資料。咁根據報道，佢哋話經過「徵詢律師意見之後」，就決定投降。入稟法院嘅電影公司因為忽然有高院，所以就可以要乜有乜，你嘅身份證號碼、地址、電話、阿媽祖家姓乜、你隻狗嘅名等等，供應商通通都要交出。
咁點解你哋會話，佢哋連白癡都不如呢？理由好簡單，喺互聯網世界裏面，特別對互聯網敏感、好奇嘅人，例如年輕一輩，都知道互聯網對現代和未來社會最大嘅威脅，就係私隱難得保全。四方八面，會用盡一切方法，去蠶食大家嘅私隱，例如有啲人會話同你有啲金錢糾紛、私人恩怨，話要從民事訴訟方式去告你，所以就去你個互聯網供應商，攞你啲私人資料。呢啲攞你私人資料嘅人，可以係你以前嘅男朋友，又可以係因日日俾你隻狗嘈醒，而非常之想報仇嘅鄰居，甚至可以係啲電影公司用緊嘅私家偵探。
應該企硬
而消費者如果可以見到一間互聯網供應商，用盡一切辦法，去維護大家嘅私隱，就算「徵詢律師意見之後」，都繼續上訴到終審庭，仲要下次有人要求客戶私人資料，呢間互聯網供應商嘅即時反應係：「No！要攞嘅就法庭見，我哋仲會用盡一切辦法，令到你有咁難得咁難打呢場官司，就算次次要打到終審庭，我哋都會照打。橫掂互聯網係一個咁新嘅嘢，其他普通法司法地區都未有定案，一定有ground去上訴。做咁多嘢，都只係因為我哋覺得客戶嘅私隱係神聖、不可侵犯嘅。」
當今香港，如果真係有一間互聯網供應商咁做，大家仲唔仆倒去做佢哋嘅客戶？所以作為互聯網供應商，一份上訴申請，比鋪天蓋地嘅廣告有效，好過搵千千萬萬個阻街Sale屎幫你sell？
孫柏文