今晚落銅鑼灣仲未諗定去邊間食飯?聽人介紹不如親身睇,見到邊間有人龍就去邊間食實無衰!今次就介紹3間銅鑼灣嘅人龍店畀大家,當中包括最新嘅日本放題、住家菜同甜品店,訪問過人龍中嘅等食人,佢已經等咗個半鐘,仍然照等,真係好食成咁!?
記者:曾靜茵
攝影:陳偉強、曾靜茵
排住隊話……
(左)林太:呢度嘅服務態度好好,就算要排隊等位都唔緊要,最緊要啲嘢食新鮮好味。
(中)Susan:見呢度主打健康嘅日本菜幾吸引就上嚟試,雖然要等位,但都覺得OK啦!
(右)Jimmy:覺得$128任食個價錢喺銅鑼灣區好抵,而且咁多人排隊,唔會差得去邊嘅!
一生任食創作和食
人龍時間:7:00pm至7:30pm及9:15pm至9:45pm
激新放題9點半後仲平
剛開業嘅「一生」可以話係銅鑼灣至人氣嘅人龍店,小記呢兩三日weekday都有落去,晚晚滿座唔在講,排隊人流仲逼爆埋電梯口,唔預早1日訂定位都起碼要等番半粒鐘先有得坐。
店內除咗以135款料理任點任食為賣點之外,而且唔係局限於傳統刺身、壽司,還有自家創作的辣泡菜餃子豆腐鍋、涼拌葛絲、成吉思汗羊肉燒等,每晚9點半後入座仲會平多幾十蚊,加上即日至5月31日,每位顧客入座仲會送迷你魚生飯一客,確實爆得有道理!
炸沢蟹
細細隻嘅沢蟹唔係度度放題都有得食,面層掃上薄薄嘅炸粉,一口一隻,用來佐酒一流!
雞絲野菜鮮腐皮卷
以白雪雪嘅北海道新鮮腐皮嚟包裹,豆味香濃兼無油,內裏就以無脂肪嘅雞胸肉切絲做餡,再配以新鮮嘅青瓜絲同紅蘿蔔絲,咬落口鮮味無窮,清新健康之選。
香煎木糬糕
有豐富纖維嘅木糬經過燜煮,然後再用橄欖油煎至香脆,食落絕唔肥膩。
食客食評
一生任食創作和食(28080384)
地址:銅鑼灣百德新街24-32號名珠城1樓
晚巿任食收費:星期一至四5:30pm至9:30pm$168、9:30pm-11:30pm$128、星期五至日及公眾假期5:30pm至9:30pm$198、9:30pm-11:30pm$158
住家菜
人龍時間:7:15pm至8:30pm
無味精住家菜周日休息
店舖位置靠近伊利莎伯橫巷內,若果唔係人龍排到出馬路我都發現唔到。雖然小店每晚人龍逼爆街頭,不過所賣嘅並非珍饈百味,而係名副其實嘅住家菜,標榜清淡少油、唔落味精,唔少街坊1星期嚟足4至5次,當中日日唔同嘅老火靚湯係熟客推介。另外,全店只有40幾個座位,唔訂位恐怕都要等一、兩粒鐘,而且唔接受6人以上訂座,星期日亦全日休息,認真有性格。
添丁骨$40
最新創製嘅添丁骨,以豬腳薑嘅醋嚟燜煮,咬落酸酸咪咪,非常醒胃。
鮮雜果咕嚕肉$40
一般餐廳以水果罐頭嚟煮,不過老闆堅持用新鮮生果,包括士多啤梨、奇異果等,啖啖鮮甜。
鹹魚茸煎肉餅$42
將鹹魚打成茸再與豬肉同煎,唔落油,以慢火煎香,食落口乾身唔油,還有陣陣鹹魚香。
一星期嚟足5日嘅鍾先生同鍾太:最鍾意個老火湯,另外添丁雞、糖醋桂花魚、煎釀茄子都好好味!
住家菜(31050456)
地址:銅鑼灣謝斐道460-462號(近伊利莎伯大廈側)
發記甜品
人龍時間:9:00pm至11:00pm
楊枝甘露日賣200碗
呢間發記開業都有2年,人龍依然,招牌楊枝甘露係鎮店之寶,日賣超過200碗,每碗差唔多用咗2個芒果,食落甜美唔會酸,加上老闆阿King周不時自創新甜品,如榴槤啫喱、意大利涼粉條等,keep住新鮮感,唔怪得喺旺角開新舖啦!
楊枝甘露$25(前)
榴槤飄香$25(後)
用新鮮芒果同榴槤打成嘅楊枝甘露及飄香,配合金柚及奶,兩者都係店中熱賣。
雜果黑珍珠意大利涼粉條$33
切成條狀嘅涼粉,望落好似墨魚汁意大利粉,配合黑珍珠同多種生果,夏天食最啱。
榴槤啫喱$20
新鮮嘅榴槤配以提子味嘅啫喱味道出奇咁夾,嗒完軟硬適中嘅啫喱後,榴槤香氣才慢慢滲出,正!
食客Tony:每次嚟都必叫楊枝甘露,好夠料,跟住會點多個馬豆糕,一濃一淡幾好味吖!
發記甜品(28383066)
地址:銅鑼灣謝斐道532號地下(世貿中心對面)