歌神許冠傑長子許懷欣（Ryan）因父之名闖樂壇，外表斯文的他決心走重型搖滾音樂路線。Ryan閒來喜歡踩滑板，一邊玩一邊聽搖滾音樂找尋創作靈感，誓要在樂壇殺出一條新血路！
歌神之子許懷欣去年正式進軍香港樂壇，後因轉經理人公司，故唱片延至今年8月才推出。雖然新碟快將推出，但愛好踩滑板的Ryan亦忙裏偷閒，相約友人到滑板場玩，從中找尋創作靈感。
夫妻跨障礙
Ryan說：「如果你有睇介紹滑板嘅片段，就知道呢啲片通常都配PunkRockMusic，而且好多夾band嘅人都鍾意踩板，所以音樂同踩板係可以夾到嘅，例如話踩板嗰陣你會諗好多新花式，盡量有自己風格，音樂都一樣，你創作嘅歌都要有自己一套。有時我會一邊踩板，一邊聽歌，真係會有好多靈感㗎。我就最鍾意踩板嗰陣聽GreenDay（美國著名搖滾樂隊）。」
Ryan愛踩滑板，還因為他和太太Candice很多回憶均與滑板有關，他說：「以前喺酒吧識我太太，後來佢知道我都踩板嘅，跟住我哋兩班朋友就一齊去玩喇！啲女仔仲會將障礙物髹晒粉紅色！」
Ryan決心向搖滾音樂路線進發，儘管歌路不同，但父親許冠傑仍相當支持乖仔。Ryan說：「佢聽過晒我嘅歌，都覺得OK，冇反對。」他更計劃兩父子拍住上出埠登台：「佢打算今年去外國做騷，下年就想喺香港搞，如果時間許可，我都會跟埋爹哋去外國做。」
採訪：王連連 攝影：陳慧安
服裝提供：DoublePark
