PS3陣營力Sell高科技，CG畫面有咁靚得咁靚，呢邊廂任天堂一於好少理，遊戲好玩先至最實際！今年E3上，任記可算搶盡風頭，新主機Wii（音：We）實物登場，大量好玩正Game供現場試玩，個個爭試體感手掣，指手畫腳、「Wii」嘩鬼叫地玩個不亦樂乎，排隊等入場試玩人數超過300人！
近幾年E3，任天堂都採用封閉式場館設計，機迷想試玩，就得大排長龍。今年亦唔例外，以Wii為主打嘅場館，仍是須排隊進入，不過既然係今年E3最矚目之作，當然引嚟大量機迷爭相入場，粗略估計，排隊人龍起碼超過300人！
最後筆者花咗2個鐘先入到場，率先映入眼簾嘅，係4個特大直立式巨芒播放宣傳片，中間大舞台就分為3組，分別Demo《Wii：網球》、《Wii：交響樂》同《銀河戰士3》，已經引嚟唔少人駐足觀看，點知再進入試玩區仲厲害，50部Wii試玩台企滿晒人，每部機均出現人龍，加上現場超過27款Wii新Game試玩，真係可以玩足一日！
PROIFLE
處理器：IBMBroaway＋ATiHollywood
記憶體：512MB（設SD卡槽）
光碟機：12cm雙層光碟（向下兼容GC遊戲）
傳輸：藍芽、IEEE802.11b/g、USB2.0
永不Cut電設計
手掣夠創意，主機亦唔弱。Wii除咗一堆體感玩法Game外，仲特別加入一個名為「WiiConnect24」功能，原理係當關閉Wil後，主機仍保留小量電源，作最低限度運作，讓遊戲可暗地裏運行，適合如《動物之森》一類長時間Run嘅遊戲，話唔定Wii版《任天狗》登場後，亦可以此模式飼養！另一項重要功能，係自動化幫你更新主機程式及升級檔，讓Wii永遠保持最Update。其他特色方面，仲可下載大量舊Game落Wii玩，包括FC、SFC、N64，甚至連PC-Engine同MegaDrive都玩得番！
搶玩重頭勁Game
Wii在硬件創意上無得頂，任記展館內亦擺咗大量對應新Game試玩台，不但自家幾款重頭作品全部有得玩，連第三廠商亦有唔少新Game落場，照睇年尾Wii推出後，肯定不愁冇Game玩！
《銀河戰士3：Corruption》
任記少有嘅科幻動作Game，《銀河戰士》系列一向都有高銷量，尤其喺歐美更係大受歡迎，可能同隻Game本身夠晒難有關！現場擺放咗Wii版最新嘅《銀河戰士3：Corruption》，畫面比GC版舊作更勝一籌，場景設計複雜細緻，兼且好多刁鑽位，玩落仍係一貫高難度，不過單單感受角色靈活多變嘅動作，已經值回票價。
《孖寶兄弟Galaxy》
打咗咁多年，終於打到上太空！新作不但以宇宙作舞台，每個關卡之間更係由小星球組成，全部都各有特色，如火山、冰地等，加上須利用手掣作移動，如左閃右避、跳躍等，而且攻敵等動作更為靈多變，踩龜攻擊更為豐富多姿，相信今集又係極為考驗反射神經。
《薩爾達傳說：曙光公主》
打破過往較Q版化嘅角色設計，《薩爾達傳說：曙光公主》回復N64時期以真實比例製作，主角林克「大人化」後，型仔得嚟亦好威武，在新作中，同樣配備劍、盾、弓箭及回力鏢等裝備，更可因應唔同環境換武器，好多謎題過關都要花心思。實地玩過，除咗畫面更為進化外，真實比例亦增加唔少遊戲壓迫力，如面對超巨大首領級敵人等。
《WarioWare：SmoothMoves》
未落手玩，已估到佢加入體感後，玩法肯定更搞鬼頂癮！試玩過後，依然保留到《MadeInWario》嗰種鬼馬風格，每個迷你遊戲簡單得嚟，都幾考反應同心思，其中幾款「練大隻」玩法，筋肉男不停做出搞鬼動作過關，相當之惡趣味！
300人爭玩任天堂新機
第三廠商勁Game撐場
電腦男有嘢講
在E3前一日，任記搞咗個記者發布會，靈魂人物宮本茂更喺開場時，以音樂指揮家扮相出場，仲要喺舞台中間升上嚟，一邊揮動指揮棒，背後奏起《薩爾達》主題交響樂，簡直化身「宮之指揮棒」！電腦男頂頭女波士喺網上睇到呢單料，恨到發燒，居然NaturalHigh到將成個過程喺腦海重現，幻想自己喺現場一樣，畀宮本茂知道有班咁忠心嘅Fans，都算安慰喇啩！
明日預告：
今日同大家搶先報道SONYPS3、任天堂Wii兩大陣營新主機，雖然呢兩部次世代機王仲未推出市面，要到年尾先登場，不過聽日仍會帶大家睇埋PS2、XB360同GC等新Game，以及各式各樣新周邊配件，當中勁Game包括《PhantasyStarUniverse》、《Halo3》等超大作，大家喺等新機上場之前，都可率先預覽吓今年仲有咩勁Game好玩！