Hea：Miss阿Sir留意　提防無印間尺

有考試，就有人作弊，無計喎，人性本醜惡，近日香港會考爆出借尿遁去廁所上網出貓就係一例。「出貓人之常情喇！」你實會咁諗；「有得出貓唔通唔出咩？」問心，你係咪咁諗？「人哋出貓我唔出貓咪好蝕？」問多次，你係咪真係咁諗？……如果你真係咁諗嘅話，Sorry，身為學生哥嘅你唔該唔好睇呢篇文，呢篇出貓8法，係寫畀一眾Miss同阿Sir睇嘅。

記者：羅灝汶　攝影：林栢鈞
特模兒：阿仙、Nico、阿智（Salvador）

出貓8法

街訪學生，綜合出以下經典兼實用出貓8法，8法中首推無印間尺，因無印推出嘅鐵間尺有磨砂面，可以喺面用鉛芯筆或鉛筆輕鬆寫定題目、答案，若慘被老師發現，用手一搓所有罪證即時一掃而空。各位Miss阿Sir留意嘞，除咗高科技上網出貓，其實日常最普遍嘅文具先至最防不勝防呀。

嚴捉8貓
1.無印間尺

史上最強出貓道具，將答案寫喺無印間尺上面。如有大量答案，會帶2把間尺備不時之需，老師發現時用手一搓犯罪證據完全消失。
課堂成功度：★★★★★
風險：★
公開試成功度：★★★★★
風險：★

（5★為滿）

2.傳答案紙

同同學夾好每人讀一Part，然後交換試卷抄寫對方答案，事先夾好易成功，不過答案過份相同會攬住死，仲有，公開考試無可能認識隔籬位同學，唔Work！
課堂成功度：★★★★
風險：★★★★
公開試成功度：★
風險：★★★★★

3.紙巾藏答案

扮傷風，拎出事先填滿答案嘅紙巾照抄，特點係紙巾呢種日用品易收藏兼掩飾力強，打個大乞嗤包保無人埋身，不過公開試試場比較開揚，最易捉。
課堂成功度：★★★★★
風險：★★
公開試成功度：★★★
風險：★★★

4.牛皮膠紙貼大髀

女生專用出貓法，寫滿答案嘅牛皮膠紙貼大髀再用裙遮住，監考老師全男班嘅話好難捉，始終男人唔敢偷望女仔裙底，唔通搜身咩？
課堂成功度：★★★
風險：★★★
公開試成功度：★★★
風險：★★★

5.鞋舌

Converse鞋舌較闊可加強掩飾力，不過鞋舌始終大極有限，上面抄唔到幾多個字。
課堂成功度：★
風險：★★★★★
公開試成功度：★★★
風險：★★★

6.擦膠

用原子筆將答案抄寫喺擦膠上，大多是難記的生字。
課堂成功度：★★★★
風險：★★
公開試成功度：★★★★
風險：★★

7.抄枱面

答案寫喺枱面，老師極難發現，不過公開考試成功度係零，因為無機會事前做準備。
課堂成功度：★★★★★
風險：★★★
公開試成功度：★
風險：★★★★★

8.抄手掌

答案抄喺掌心，握實拳頭就無人睇到，少手汗同學多用。
課堂成功度：★★★
風險：★★★
公開試成功度：★★★
風險：★★★

考生勁嬲

上星期中學會考英文科考試（課程乙）試卷二，考評局在其中3個部份嘅試題上，附印網址顯示試題出處，令唔少考生假借如廁，利用手機上網尋找答案。事件曝光後即成為各大小討論區熱話，有唔少考生認為事件會影響8萬名應考此卷嘅考生評分，繼而引發網上聯署簽名聲討考評局及學生組織嘅「黑衣行動」（紅圈），相信事件仍會擾嚷一段日子。