每次股票經紀有活動，都梗有幾個鐵膽捧場客，邊幾個？就係馬時亨、周文耀，同埋詹培忠。噚日佢三個又喺香港網上經紀協會（HKAOB）五周年酒會碰頭，向來惹火嘅金勞詹，又忍唔住喺大庭廣眾話Paul周「謀殺」小股民，仲大大聲要馬仔主持公道。
話說金勞詹同Paul周前後腳到場，兩人本來相安無事，唔知係咪有人又提起第二階段收窄買賣差價呢個話題，挑起金勞詹嘅怒氣，佢即刻當眾發炮，咁中彈嘅就梗係周總裁啦。
金勞詹話，已經有好多小股民私下叫佢組織上街遊行抗議，日子都揀定6月4日，集合地點就未定，家吓就要睇有幾多人行出嚟，如果人數有三五百人，佢保證一定做帶頭嗰個。
俾指為謀殺犯嘅周文耀，好好聲氣咁話：「歡迎大家不同意見」，梗係，噚日388個價創新高，最高去到$63.5，收市都有$63.4，淨係計周總裁手頭上嗰246萬股Option（行使價8.28元），都值1.36億，使乜同你嘈呀！
馬仔：我陪你做殺手
做和事老嘅馬仔聽住詹培忠呻，話要幫兩個當事人擺和頭酒，點知轉過頭就好風騷咁同Paul周講：「我陪你做殺手！」然後孖住周文耀趕下場。
講番俾三個男人搶晒風頭嘅HKAOB，佢哋01年10月成立，但家吓五月就急急腳搞生日會，無非睇中近日股市旺盛，等會員出師有名，推出啲免佣、免託管或轉倉費嘅「生日」優惠，實則咪又係想搶多啲生意，咁先實際。
李華華
讀者如有任何意見或報料，歡迎發送電郵至[email protected]。