李家大少李澤鉅噚日喺長建股東會後心情靚爆鏡，鬼咩，「四索」得男，又適逢賣港口賺成340億，真係年頭有乜唔開心嘅事都一筆過叮走晒啦。佢話暫時只係幫仔仔改咗英文名，中文名未有，屋企嗰改名committee手上有好多個proposal，仲喺度揀緊喎！
有記者問佢仲會唔會再追多個，大少個反應好大，話啱啱先生完，點都要唞唞先啩！不過，佢冇進一步解釋，到底係佢要唞，定係佢太座王儷橋要唞？李澤鉅今年四十有一，佢太座就三十有五，咁嘅話……
講開又講，噚日舉行股東會嘅長科（8222）、港燈（006）同埋長建（1038），居然一反傳統唔畀傳媒入去旁聽。
出名股東多嘅港燈唔畀入都算，但長科同長建年年都坐唔滿，斷估唔係擔心再有「水魚」股東搞寸而又見報咁小氣啩？總之就好唔明。