理文造紙（2314）同玖龍紙業（2689）一向受投資者歡迎，兩隻紙業股一直節節上升，但早兩日瑞信出報告，話嫌玖龍升得過多，而理文造紙07年的擴產速度較快，所以大幅調高理文造紙的目標價，令股價連續急升兩日，而玖龍走勢就明顯轉弱。
經紀黃話，查實芬佬兩隻造紙股都咁鍾意，股價可以齊齊升，去比較邊隻好啲，只係意氣之爭。
理文造紙昨日再升6.25％，收13.60元，雖然已係上市以來新高，但距離瑞信的17元目標價重有水位。玖龍昨日跌唔夠1％，收6.80元，低於早前的7元徘徊區水平。
另外，前稱御泰國際的華基光電（155），今日喺深圳做推介會，據講博士仲會親自出現向投資者介紹發展計劃。昨日隻股先行炒高，升11％，收0.91元，成交股數7754萬股，金額6827萬元。
經紀陳話，公司除咗推介會外，傳聞稍後可能會引入策略性夥伴。
慕容小初