地鐵會起西港島線，消息一出，區內反應好正面，不過，由於地鐵有意拆咗個堅尼地城泳池，興建堅尼地城車站同上蓋，噚日薄扶林翰林軒門口，就掛咗兩幅橫額，強烈反對地鐵咁做，聽講最主要原因係重建後，翰林軒嘅靚景就冇晒咁滯。
原來翰林軒𠵱家對正呢個泳池，日後起咗樓，變成得番樓景，所以業主梗係強烈反對啦。唔知遲吓係咪會有更激嘅行動呢？
蘭西問世紀21張志明，佢話翰林軒部份業主已經急急放盤，個價都回咗好多，以627呎單位為例，成交價一向做開350萬至370萬嘅，𠵱家就有業主劈價，放盤叫緊310萬至320萬。
佢話過去一個禮拜，公司已經接到4至5個放盤，比以前兩三個禮拜至得1至2個，多咗好多。