繼天津市後，寧夏回族自治區亦嚟香港舉行大型招商活動。
位處中國中北部嘅寧夏，面積達6.64萬平方公里，但人口比香港仲要低少少，只有約600萬人；至於經濟發展水平，喺全國由尾數起，跟西藏青海叮噹馬尾。
佢哋嚟港招商受重視程度，當然比唔上同期嘅天津市；但難得仍獲李兆基嘅恒基兆業，同郭鶴年嘅嘉里支持見個面，寧夏發展改革委員會副主任張八五話，兩間企業都有興趣，各自派員到當地考察，睇吓有冇投資機會。
而寧夏嘅重點產業，係枸杞、牛奶、清真牛肉同馬鈴薯，而煤炭儲量亦好豐富，位居全國第6。今次嚟港招商，寧夏仲帶同11世紀嘅西夏文物做展覽，愛好者不容錯過，今日喺華潤3樓展出最後一日。