向來語不驚人死不休的陳奕迅（Eason），率直性格原來深得李克勤讚賞，前晚兩人齊齊錄影《勁歌金曲》時，克勤便向記者大讚Eason敢言，又指他甚有潛質做棟篤笑表演。
李克勤前晚大讚Eason敢言，事緣陳奕迅日前接受無綫節目《東張西望》訪問時，被問到陳小春加入他所屬的唱片公司，令相熟的兩人要爭做一哥的新聞，Eason即不客氣地說：「你點知我同小春熟啫？」對此克勤說：「時下嘅人或我都唔夠膽咁講，我講都會驚小春唔開心，不過佢講就唔會喇，呢個係佢個人風格。」
關心妍被騷擾
但Eason得知被克勤稱讚後，反而歎氣說：「唉！我講嘢都係有感而發啫，克勤話覺得個訪問好笑，但我唔想笑，我想嬲㗎，當日係喺公開活動上，有記者可以全部問我關於活動嘅問題，但有記者就要問私人問題，加上我嗰日心情麻麻，先有啲怨氣出咗嚟。」
而Eason前晚在節目中獻唱了林憶蓮的《沒有你還是愛你》及關淑怡的《戀一世的愛》等歌曲，又與主持人at17合唱郭富城的《對你愛不完》，可惜聲音配合得不太協調。
此外，關心妍近日忽然富貴，既由羅便臣道搬往大潭，又打算買MiniCooper新車代步，她前晚說：「睇吓之嘛，我相信唱片要加印4次先買到架車，不過𠵱家搬咗屋出入好唔方便，有次夜晚搭的士俾司機騷擾，搞到我𠵱家唔敢搭的士。」
採訪：卓寶花
攝影：陳順禎
