前幾日睇電視，喺一個澳洲嘅烹飪節目中，有個中國人自創咗一個菜式，酸酸甜甜好開胃，撈飯或意粉最正，我個囡囡食完都大讚，一定要向大家推介。材料包括3個番茄、3個青蘋果、一堆黑提子乾、金沙排骨1斤、紅酒半杯、乾葱頭5粒、蒜頭半個及魷魚或八爪魚適量。
先用鹽、米酒及胡椒粉醃吓啲金沙骨，煎至金黃色，然後加半杯紅酒就將佢撈起。魷魚或八爪魚出水去衣。葱頭就切成一圈圈，夾住啲蒜茸。番茄去皮去核。提子乾洗淨同埋烚到脹卜卜。爆香葱頭後就將所有材料落鑊煮，加水加鹽調味後，放刨了絲的青蘋果，中火燜20分鐘，搞掂。我就用嚟撈天使麵食，囡囡初時話碟麵咁大嘅？但唔覺唔覺就食晒。